Ўзбекистон ва АҚШ Фармакопеяси фармацевтика соҳасини ривожлантиришни муҳокама қилди

Тошкент, Ўзбекистон (UzDaily.uz) — Ўзбекистон Соғлиқни сақлаш ва фармацевтика соҳасини ривожлантириш агентлиги АҚШ Фармакопеяси (United States Pharmacopeia, USP) вакиллари билан онлайн учрашув ўтказди. Унда томонлар фармацевтика соҳасининг илмий ва касбий салоҳиятини ривожлантириш масалаларини муҳокама қилди. Бу ҳақда Соғлиқни сақлаш ва фармацевтика соҳасини ривожлантириш агентлиги хабар берди.

Учрашувнинг асосий йўналишларидан бири кадрлар салоҳиятини мустаҳкамлаш ва профессионал тажриба алмашинувини кенгайтириш бўлди. Иштирокчилар ўзбекистонлик олимлар ва мутахассисларни USPнинг етакчи лабораториялари ҳамда бошқа объектларига юбориш имкониятини кўриб чиқди. Бундай формат мутахассисларга амалий тажриба орттириш ва малакасини ошириш имконини бериши кутилмоқда.

Ўзбекистонда ташкил этилаётган лаборатория ва илмий-тадқиқот инфратузилмаси фаолиятида АҚШ Фармакопеяси экспертларининг эҳтимолий иштирок этишига ҳам алоҳида эътибор қаратилди. Томонлар, шунингдек, USP мутахассисларини жалб қилган ҳолда амалий машғулотлар ва тажриба алмашинуви дастурларини ўтказиш масаласини муҳокама қилди.

Бундан ташқари, учрашув иштирокчилари Ўзбекистонда ташкил этилаётган замонавий лабораториялар ва илмий-тадқиқот марказларини лойиҳалаш ҳамда жиҳозлашда USPнинг илғор халқаро ёндашувларидан фойдаланиш имкониятини кўриб чиқди.

Муҳокамалар касбий компетенцияларни янада ривожлантириш, халқаро мутахассислар билан амалий ҳамкорликни кенгайтириш ва фармацевтика соҳасида замонавий илмий-тадқиқот инфратузилмасини шакллантиришда USP тажрибасидан фойдаланишга қаратилди.