Ўзбекистон Германиянинг кўчмас мулкни бошқариш тажрибасини ўрганди
Тошкент, Ўзбекистон (UzDaily.uz) — Ўзбекистон Давлат активларини бошқариш агентлиги 27 август куни Германия вакиллари иштирокида давлат кўчмас мулкини бошқаришда замонавий ёндашувларга бағишланган онлайн-семинар ўтказди. Бу ҳақда Ўзбекистон Республикаси Давлат активларини бошқариш агентлиги хабар берди.
Тадбирда Германия Федерал кўчмас мулк институти (BImA), Германия Федерал молия вазирлиги, Халқаро ҳамкорлик бўйича Германия жамияти (GIZ) ва Indecon Consulting вакиллари иштирок этди.
Семинарнинг асосий мавзуси давлат кўчмас мулкини марказлаштирилган бошқариш бўйича Германия тажрибаси, шунингдек, давлат объектларидан фойдаланиш самарадорлигини оширишнинг амалий механизмлари бўлди.
Давлат активларини бошқариш агентлиги директори Соҳибжон Муродов Германиянинг кўп йиллик тажрибаси Ўзбекистонда давлат мулкини бошқариш тизимини янада такомиллаштириш учун қизиқиш уйғотишини таъкидлади. Хусусан, у BImA институционал моделини, шунингдек, давлат кўчмас мулкини баҳолаш, сотиш ва ижарага бериш механизмларини алоҳида қайд этди.
BImA вакиллари Йорг Музиаль ва Роберт Эрфен Германияда федерал кўчмас мулкни бошқариш, объектлардан самарали фойдаланиш ва уларга техник хизмат кўрсатиш бўйича амалий ёндашувларни тақдим этди. Иштирокчилар, шунингдек, объектларни марказлаштирилган бошқарувга ўтказиш ва давлат активларининг рақамли реестрларини юритиш механизмларини кўриб чиқди.
Фойдаланилмаётган ёки етарлича самарали ишлатилмаётган давлат кўчмас мулки объектларини иқтисодий муомалага жалб қилиш масаласига ҳам алоҳида эътибор қаратилди.
Германия Федерал молия вазирлиги бўлинмаси раҳбари Кристина Клас Ўзбекистонда давлат активларини бошқариш ва хусусийлаштириш соҳасида амалга оширилаётган ислоҳотларни қайд этди. Унинг сўзларига кўра, мамлакат мулкни бошқаришнинг замонавий механизмларини изчил жорий этмоқда ва хусусий секторнинг ролини кенгайтирмоқда.
Семинар давомида томонлар ушбу соҳада Ўзбекистон ва Германия ўртасидаги ҳамкорликни янада ривожлантириш масалаларини ҳам муҳокама қилди. Давлат кўчмас мулкини бошқариш бўйича тажриба алмашинувини уч босқичда амалга ошириш режалаштирилган.
Биринчи босқичда Агентлик мутахассислари учун онлайн ўқув семинарлари ташкил этилади. Кейин Германия экспертлари ҳамкорликнинг истиқболли йўналишларини аниқлаш учун Ўзбекистонга ташриф буюради. Учинчи босқич Агентлик делегациясининг Германияга амалий ташрифини назарда тутади. Ташриф давомида BImA фаолияти ва давлат кўчмас мулкини бошқаришнинг амалдаги механизмлари ўрганилади.
Семинар якунлари бўйича иштирокчилар тажриба алмашинувини янада ривожлантириш ва замонавий ёндашувларни Ўзбекистон давлат активларини бошқариш тизимига жорий этиш истиқболларини муҳокама қилди.
