Ўзбекистон терма жамоаси Фабио Каннаваро раҳбарлигида илк машғулотни ўтказди

Тошкент, Ўзбекистон (UzDaily.uz) — Ўзбекистон футбол терма жамоаси 7 октябрь куни янги бош мураббий Фабио Каннаваро раҳбарлигида илк машғулотини ўтказди.

Миллий олимпия қўмитаси машғулот жараёнидан суратлар ва видеоларни эълон қилди.

Машғулотлар яқинда фойдаланишга топширилган Миллий футбол марказида бўлиб ўтмоқда. Футболчилар мураббийлар штаби раҳбарлигида жисмоний машқлар билан шуғулланиб, тўп билан ишлаш бўйича амалий машғулотлар ўтказдилар.

Эслатиб ўтамиз, терма жамоа 9 октябрь куни Тошкентда Қувайтга қарши, 13 октябрь куни эса Малайзияда Уругвайга қарши халқаро ўртоқлик учрашувларини ўтказади.