Ўзбекистон аҳолисининг деярли барчаси мобил телефондан фойдаланади

Тошкент, Ўзбекистон (UzDaily.uz) — Ўзбекистонда мобил телефонлардан фойдаланувчи аҳоли улуши 99,3 фоизга етди.

Бу маълумотлар 2025 йил якунлари бўйича Миллий статистика қўмитаси томонидан ўтказилган уй хўжаликлари танлама кузатувлари натижаларида келтирилган.

Статистик маълумотларга кўра, кўрсаткич 10 ёш ва ундан катта аҳоли қатлами учун ҳисобланган. Ўтган йилга нисбатан мобил телефонлардан фойдаланиш даражаси 0,2 фоиз бандига ошган.

Сўнгги беш йил ичида мамлакатда аҳолининг мобил алоқа билан қамрови барқарор ўсиш тенденциясини намоён этмоқда. Агар 2021 йилда ушбу ёш тоифасидаги аҳолининг 95,7 фоизи мобил телефонлардан фойдаланган бўлса, 2022 йилда бу кўрсаткич 97,8 фоизга етган.

2023 ва 2024 йилларда мобил телефон фойдаланувчилари улуши 99,1 фоизни ташкил этган бўлса, 2025 йилда бу кўрсаткич 99,3 фоизга етди. Бу эса аҳолининг мобил алоқа билан деярли тўлиқ қамраб олинганини кўрсатади.