Тошкент, Ўзбекистон (UzDaily.uz) — Ўзбекистон илк бор Париждаги Конкорд майдонида (Place de la Concorde) бўлиб ўтган Village International de la Gastronomie халқаро гастрономик фестивалида миллий стенди билан иштирок этди. Мамлакатнинг тадбирдаги иштироки «Миллий PR-марказ» давлат муассасаси томонидан ташкил этилди.
Халқаро гастрономик фестивалнинг X тадбири доирасида ташриф буюрувчилар ўзбек таомлари, анъанавий ҳунармандчилик ва маданият билан танишиш имкониятига эга бўлди. Майдончада очиқ оловда палов, сомса ва манти тайёрланди, меҳмонларга эса ўзбек пахлаваси ва чойи таклиф этилди.
Ташриф буюрувчиларнинг алоҳида эътиборини Ўзбекистоннинг анъанавий санъат ва ҳунармандчилик турлари билан боғлиқ буюмлар, жумладан, миниатюра санъати намуналари, тўқимачилик маҳсулотлари, кулолчилик буюмлари ва чой сервизлари тортди.
Бухоролик миниатюрачи рассом Хондамир Боронов меҳмонлар учун маҳорат дарслари ўтказиб, миниатюра яратишнинг анъанавий техникаси ҳақида сўзлаб берди.
Дастурнинг гастрономик қисми ҳам катта қизиқиш уйғотди. Plov & Samsa вакиллари бир кунда 1 мингтагача сомса сотди, таомлар ва ичимликлар эса фестиваль иши якунланишидан олдин ҳам бир неча бор тугаб қолди.
Тадбирда иштирок этиш Ўзбекистонни француз аудиториясига миллий таомлар, анъанавий ҳунармандчилик ва бевосита маданий мулоқот орқали таништириш имконини берди.
