Ўзбекистон нефт маҳсулотлари импортини 24 фоизга оширди

Тошкент, Ўзбекистон (UzDaily.uz) — 2026 йил январь–апрель ойларида Ўзбекистоннинг нефть ва нефт маҳсулотлари импорти учун умумий харажатлари 661,6 миллион долларни ташкил этди. Бу 2025 йилнинг шу давридаги 534,5 миллион долларлик кўрсаткичдан 23,8 фоизга юқори. Бу ҳақда Республика Давлат божхона қўмитаси маълумотларида қайд этилган.

Импорт харажатларининг умумий ўсиши ортида турли йўналишдаги тенденциялар кузатилди: бензин импорти икки баробарга ошган бўлса, ёқилғи мойи харидлари деярли йўқолган.

Энг катта ўзгариш бензин сегментида қайд этилди. Тўрт ой давомида бензин импорти ҳажми 280,7 миллион литрдан 568,7 миллион литрга етди, яъни 103 фоизга ошди. Импорт қилинган ёнилғининг қиймати ҳам мутаносиб равишда 163,6 миллион доллардан 327,1 миллион долларгача кўтарилиб, қарийб икки баробар ўсди.

Бензин нефт маҳсулотлари импортида энг йирик йўналиш бўлиб қолмоқда. Унинг умумий импорт қийматидаги улуши ўтган йилги 31 фоиздан 49 фоизгача ошди.

Дизель ёқилғиси импорти ҳам ўсишни кўрсатди, аммо анча паст суръатда. Етказиб бериш ҳажми 201,6 миллион килограммдан 237,5 миллион килограммгача ёки 17,8 фоизга ошди. Қиймат жиҳатидан эса импорт 154,6 миллион доллардан 185,6 миллион долларгача ўсиб, 20 фоизлик ўсиш қайд этилди. Дизель ёқилғиси умумий импорт қийматидаги 28 фоиз улуш билан иккинчи ўринни сақлаб қолди.

Мотор, трансмиссион ва бошқа мойлаш материаллари импорти ҳам ўсди. Табиий ҳажмда импорт 29,3 миллион килограммдан 37,5 миллион килограммгача ёки 27,9 фоизга кўпайди. Қиймат жиҳатидан эса 51,7 миллион доллардан 66,4 миллион долларгача ўсиш кузатилиб, 28,4 фоизни ташкил этди. Бу мамлакатда саноат ва транспорт фаоллигининг жонланганини акс эттиради.

Бошқа суюқ ёнилғи турлари сегментида ҳам кескин ўсиш кузатилди. Уларнинг импорти ҳажми 14,5 миллион килограммдан 64,3 миллион килограммгача ошиб, тўрт баравардан зиёд кўпайди. Қиймати эса 8,7 миллион доллардан 34,5 миллион долларгача ўсди. Бу альтернатив ёнилғи турларидан саноатда кенгроқ фойдаланиш ёки айрим товар позициялари классификациясининг ўзгарганини кўрсатиши мумкин.

Ёқилғи мойи сегменти эса мутлақо тескари манзарани намоён қилди. Унинг импорти 227,9 миллион килограммдан 14 миллион килограммгача тушиб, табиий ҳажмда 93,9 фоизга қисқарди. Қиймат жиҳатидан эса харидлар 92,2 миллион доллардан 3,9 миллион долларгача камайиб, 95,8 фоиз йўқотиш қайд этилди.

2025 йил январь–апрель ойларида ёқилғи мойи нефт маҳсулотлари импорти харажатларининг 17 фоизини ташкил этган бўлса, ҳозирда унинг улуши бир фоиздан ҳам ошмайди.

Бошқа енгил дистиллятлар импорти ҳам учдан бир қисмга қисқарди. Табиий ҳажм 76,7 миллион килограммдан 50,7 миллион килограммгача камайди. Қиймат жиҳатидан эса импорт 49,4 миллион доллардан 28,9 миллион долларга тушиб, 41,3 фоизлик пасайиш кузатилди.

Керосин импорти деярли ўзгаришсиз қолди. Унинг ҳажми 14,8 миллион килограммдан 15,8 миллион килограммгача бироз ошди. Қиймати эса 14,3 миллион доллардан 15,1 миллион долларгача кўтарилди.