Тошкент, Ўзбекистон (UzDaily.uz) — Зарафшон миллий табиат боғи маъмурияти Чегара каналида доимий сув оқими тўхтаганини тасдиқлади. Ушбу канал кўп йиллар давомида ёввойи ҳайвонлар учун сув манбаларидан бири бўлиб хизмат қилган.
Муаммонинг сабабларини аниқлаш мақсадида сув хўжалиги мутахассислари ва гидролог олимлар иштирокида қўшма тадқиқот ўтказиш режалаштирилмоқда.
Маъмуриятнинг баёнотига EKOLOG.UZ портали ва ижтимоий тармоқларда эълон қилинган боғ илмий ходими Э. Б. Холмановнинг «Қурғоқчилик ва ўзбошимчалик миллий боғга таҳдид солмоқда» номли мақоласи сабаб бўлди.
Боғ ходимларининг кузатувларига кўра, муҳофаза этиладиган ҳудуд чегараси бўйлаб ўтувчи каналда сув ҳажми 2022 йилдан бошлаб сезиларли даражада камая бошлаган. 2023 йилда эса доимий сув оқими тўхтаган.
Авваллари канал маҳаллий ҳайвонот дунёси вакилларини, жумладан, бухоро буғуси ва зарафшон қирғовулини сув билан таъминлаган. Боғ маъмурияти мақола муаллифининг экологик ўзгаришлар юзасидан билдирган хавотирларига қўшилишини таъкидлади.
Шу билан бирга, сув оқимининг тўхташига олиб келган аниқ сабаблар ҳозирча белгиланмаган. Эҳтимолий омиллар қаторида Зарафшон дарёсининг гидрологик режимидаги ўзгаришлар ва хўжалик фаолияти таъсири кўрсатилган. Ушбу тахминларни тасдиқлаш учун қўшимча тадқиқотлар ўтказиш зарур.
Боғ маъмурияти сув хўжалиги мутахассислари, гидролог олимлар ва ваколатли органлар вакиллари иштирокида вазиятни биргаликда ўрганиш ташаббуси билан чиқишни режалаштирмоқда.
Тадқиқот натижаларига кўра, Чегара каналида сув таъминотини эҳтимолий тиклаш ва миллий боғ экотизимини сақлаб қолиш бўйича таклифлар ишлаб чиқиш кўзда тутилган.
