Тошкент, Ўзбекистон (UzDaily.uz) — Made in Uzbekistan бренди остидаги ўзбек компаниялари маҳсулотлари Парижда бўлиб ўтган SIAL Paris 2026 халқаро озиқ-овқат кўргазмасида бир йўла бешта миллий павильонда намойиш этилди. Илгари ўзбекистонлик тадбиркорларнинг ушбу кўргазмада бирорта ҳам миллий павильони бўлмаган. Делегация иштирокчилари бир қатор экспорт шартномаларини имзолади. Бу ҳақда «Ўзбекистон 24» телеканали хабар берди.
SIAL Paris кўргазмаси 31-марта ўтказилди. У ҳар икки йилда бир марта ташкил этилиб, дунёнинг турли мамлакатларидан йирик ишлаб чиқарувчилар, тадбиркорлар ва харидорларни бир жойга тўплайди.
Иштирокчиларнинг айтишича, савдо соҳасидаги хорижий мутахассисларни, аввало, ўзбек маҳсулотларининг табиийлиги ва органик келиб чиқиши қизиқтирмоқда. Экспортчилардан бири компанияси 2017 йилда 200 минг долларлик маҳсулот экспорт қилганини, ҳозирда эса бу кўрсаткич 20 миллион долларга етганини айтди. Кўргазма якунланмасидан олдин компания 3 миллион долларлик шартнома имзолади. Унинг сўзларига кўра, компания 100 дан ортиқ мамлакат вакиллари билан музокара олиб бормоқда ҳамда Франция, Германия ва Нидерландияга маҳсулот етказиб бермоқда.
Яна бир иштирокчи Нидерландия, Франция, Саудия Арабистони ва Туркманистондаги ҳамкорлар билан шартномалар имзоланганини маълум қилди. Буюк Британия ва Канада компаниялари ҳам ўзбек маҳсулотларига қизиқиш билдирган.
Хорижий компаниялар ҳам ҳамкорликка қизиқишини билдирди. Германия экспорт компанияси бош директори Мириам Гуатернинг таъкидлашича, ўзбек маҳсулотлари сифати ва таъми туфайли Европа харидорлари орасида тобора оммалашмоқда. Унинг айтишича, дастлабки келишувларга эришилган.
Америка савдо компанияси раҳбари Либа Энджи ўзбекистонлик тадбиркорлар билан маҳсулотларни Аргентина ва Венесуэлага экспорт қилиш бўйича шартномалар тузилганини маълум қилди. Туркиянинг қўшма корхонаси раҳбари Бора Кандан эса ўзбек ҳамкорлари билан биргаликда заводлар қурилаётганини айтди.
Музокаралардан ташқари, делегация иштирокчилари жаҳон озиқ-овқат бозоридаги янги тенденцияларга бағишланган маҳорат дарслари ва тақдимотларда ҳам қатнашди.
