Тошкент, Ўзбекистон (UzDaily.uz) — Ўзбекистоннинг Андижон, Самарқанд ва Бухоро вилоятларида «Қорадори-2026» тезкор-профилактик тадбири доирасида таркибида гиёҳвандлик моддалари бўлган ўсимликларни етиштириш ва марихуана сақлаш ҳолатлари аниқланди.
Жами 70 кг гиёҳвандлик воситалари ва таркибида гиёҳвандлик моддалари бўлган ўсимликлар аниқланди. Бу ҳақда Ички ишлар вазирлиги матбуот хизмати хабар берди.
Тадбирнинг иккинчи босқичида вертолётлардан фойдаланган ҳолда назорат парвозлари амалга оширилди.
Андижон вилояти Олтинкўл туманида уйида 24 кг марихуана сақлаган маҳаллий аҳоли вакили ушланди. Шу туманда ҳуқуқни муҳофаза қилувчи органлар 520 туп каннабисдан иборат плантация ташкил қилган ферма бошқарувчисини ҳам қўлга олди.
Избоскан туманида яшовчи яна бир фуқаронинг уйидан 6 кгдан ортиқ марихуана аниқланди.
Самарқанд вилояти Самарқанд туманида мутахассислар маҳаллий аҳоли вакили томонидан 41 туп каннабис етиштирилаётган томорқа участкаси борлигини аниқлади. Шунингдек, ундан 400 грамм марихуана ҳам топилди.
Бухоро вилояти Бухоро туманида томорқасида 46 туп каннабис етиштирган эр-хотин ушланди. Бошқа бир ҳолатда ҳуқуқни муҳофаза қилувчи органлар 53 туп каннабис етиштирган оила аъзоларини аниқлади.
Аниқланган ҳолатлар бўйича Жиноят кодексининг экиш тақиқланган экинларни етиштириш учун жавобгарликни назарда тутувчи 270-моддаси 1 ва 2-қисмларининг тегишли бандлари, шунингдек, гиёҳвандлик воситалари, уларнинг аналоглари ёки психотроп моддаларни сотиш мақсадида ноқонуний ҳаракатлар содир этиш ёки уларни сотишга оид 273-модда 6-қисми билан жиноий ишлар қўзғатилди.
Айни пайтда тергов ҳаракатлари давом эттирилмоқда.
