Тошкент, Ўзбекистон (UzDaily.uz) — Фарғона вилояти Қўштепа туманида бир аёл туман туғруқхонасининг икки нафар ҳамширасига пичоқ билан ҳужум қилди. Жабрланганлардан бири ҳалок бўлган, иккинчисига шошилинч тиббий ёрдам кўрсатилган. Бу ҳақда Kun.uz хабар берди.
Ҳодиса 7 сентябрь куни содир бўлган. Нашр маълумотига кўра, аёл туғруқхона хоналаридан бирида икки нафар ҳамширани қамаб қўйган ва шундан сўнг уларга пичоқ билан жароҳат етказган.
Ҳамширалардан бири воқеа жойида вафот этган. Иккинчи жабрланувчига зарур шошилинч тиббий ёрдам кўрсатилган.
Ҳодиса юзасидан Ўзбекистон Республикаси Жиноят кодексининг қасддан одам ўлдириш учун жавобгарликни назарда тутувчи 97-моддаси билан жиноят иши қўзғатилган.
Ҳужумда гумонланаётган аёл ушланган.
Айни пайтда тергов ҳаракатлари давом эттирилмоқда.
