«Нефтчи» Франция Лигаси ҳимоячисини ўз сафига қўшиб олди

Тошкент, Ўзбекистон (UzDaily.uz) — Фарғонанинг «Нефтчи» футбол клуби Кот-д’Ивуарлик ҳимоячи Коффи Куао билан шартнома имзолади. Футболчи ўтган мавсумда Франциянинг «Мец» клубида тўп сурган ва мамлакат чемпионати, жумладан Лига 1 учрашувларида майдонга тушган.

27 ёшли футболчи профессионал фаолияти давомида Франция ва Португалия чемпионатларида 200 дан ортиқ расмий учрашувда иштирок этган. Унинг асосий позицияси марказий ҳимоячи ҳисобланади.

Куао фаолиятини Португалияда бошлаган бўлиб, у ерда «Витория Гимарайнш» ва «Тондела» клублари шарафини ҳимоя қилган. Кейинчалик у Францияга кўчиб ўтиб, «Мец» таркибида Лига 1 ва Лига 2 мусобақаларида ўйнаган.

Transfermarkt маълумотларига кўра, ҳимоячининг трансфер қиймати 2,5 миллион еврога баҳоланмоқда. Бу кўрсаткич Куаони айни пайтда Ўзбекистон чемпионатида иштирок этаётган футболчилар орасида энг юқори трансфер қийматига эга ўйинчига айлантирди.

Шунингдек, Франция чемпионатидан амалга оширилган ушбу трансфер сўнгги йилларда «Нефтчи»нинг энг эътиборли трансферларидан бирига айланди. Бу трансфер Коффи Куаони Ўзбекистон Суперлигаси тарихидаги энг юқори қийматга эга футболчилар қаторига ҳам киритди.