Тошкент, Ўзбекистон (UzDaily.uz) — Наманган вилояти ва Австриянинг IMC Krems амалий фанлар университети касбий ва дуал таълим соҳасидаги ҳамкорликни, жумладан, меҳмонхона ва туризм соҳалари учун мутахассислар тайёрлаш йўналишини кенгайтириш ниятида.
Наманган вилоятига IMC Krems асосчиси ва Кузатув кенгаши раиси Ҳайнц Бойер бошчилигидаги делегация ташриф буюрди. Бу ҳақда Наманган вилояти ҳокимлиги ахборот хизмати хабар берди.
Наманган вилояти ҳокими Шавкатжон Абдураззоқов Австрия делегациясини қабул қилди.
Учрашувда томонлар меҳмонхоналарни бошқариш соҳасида халқаро стандартларга мувофиқ мутахассислар ва тренерлар тайёрлаш, шунингдек, касбий таълим тизимида Австрия тажрибасини қўллаш масалаларини муҳокама қилди.
Ташриф доирасида Ҳайнц Бойер ва университетнинг илмий тадқиқотлар ҳамда инновациялар бўйича раҳбари Удо Кристиан Брендл Чортоқ туманидаги 1-сонли техникумга ташриф буюрди.
Меҳмонлар таълим муассасасининг ўқув дастурлари, моддий-техник базаси, ўқув устахоналари ва лабораториялари билан танишди.
Техникум негизида Австрия тажрибасини инобатга олган ҳолда таълим дастурларини жорий этиш ва дуал таълим моделини янада ривожлантириш режалаштирилмоқда.
Томонлар таълим муассасалари ва саноат ўртасидаги ҳамкорликни такомиллаштиришга ҳам алоҳида эътибор қаратди.
Касбий таълим бошқармаси бошлиғи Абдулаҳад Ғаффоровнинг сўзларига кўра, Мактабгача ва мактаб таълими вазирлиги билан келишувлар доирасида Наманганда Австрия дуал таълим тизими асосида халқаро меҳмонхона менежменти мактаблари ташкил этилмоқда.
1-сонли техникумга ташриф ушбу ишларнинг бир қисми бўлди.
Музокаралар давомида Австриянинг касбий таълим ташкилотлари билан ҳамкорликни янада ривожлантириш, қўшма таълим ташаббусларини амалга ошириш, ўқитувчи ва талабалар алмашинуви, халқаро стажировкалар ҳамда амалиётга йўналтирилган таълимни ривожлантириш масалалари ҳам муҳокама қилинди.
Австрия делегацияси, шунингдек, Ахсикент археопаркига ташриф буюриб, у ерда амалга оширилаётган бунёдкорлик ишлари ва ташкил этилаётган очиқ осмон остидаги музейлар билан танишди.
Ҳайнц Бойер «Абадий шаҳар» лойиҳасининг таъсирчан кўламини қайд этиб, келажакда ушбу ҳудуд сайёҳлик марказига айланиши мумкинлигини билдирди.
IMC Krems вакиллари билан яна бир ишчи учрашув «Oydin Plaza» меҳмонхонасида бўлиб ўтди. Унда Наманган вилояти ҳокими ўринбосари Хондамир Аҳунбобоев, Ҳайнц Бойер ва Удо Кристиан Брендл иштирок этди.
Иштирокчилар туризм соҳаси учун кадрлар тайёрлаш, қўшма таълим дастурларини йўлга қўйиш ва таълимни амалиёт билан интеграция қилиш масалаларини яна бир бор кўриб чиқди.
Ҳамкорликка 27 сентябрдан 2 октябрга қадар давом этган Ўзбекистон делегациясининг Австрияга ишчи ташрифи замин яратган.
Делегация таркибида Чортоқ туманидаги 1-сонли техникум директори А. Холиқов ҳам бор эди. Ташриф давомида томонлар касбий таълим соҳасида тажриба алмашди ва ҳамкорликни кенгайтиришга қаратилган ўзаро англашув меморандумини имзолади.
Эришилган келишувлар Наманган вилоятининг туризм ва меҳмонхона хўжалиги соҳаси учун амалий ва дуал таълимни янада ривожлантириш, тажриба алмашиш ҳамда малакали кадрлар тайёрлашни назарда тутади.
