Мирзиёев бизнесни қўллаб-қувватлашнинг янги чораларини эълон қилди

Тошкент, Ўзбекистон (UzDaily.uz) — Ўзбекистон Президенти Шавкат Мирзиёев 18 август куни Хоразм вилоятида тадбиркорлар билан очиқ мулоқотда бизнесни қўллаб-қувватлашнинг янги чораларини эълон қилди. Улар қаторида ривожланишнинг турли босқичларидаги компаниялар учун дастурларни ишга тушириш ва кредитлар бўйича контркафолат механизмини жорий этиш ҳам бор. Бу ҳақда Ўзбекистон Республикаси Президенти матбуот хизмати хабар берди.

Давлат раҳбарининг сўзларига кўра, банклар кредит портфелида кичик бизнес улуши 45 фоиздан 63 фоизга ошган. Биринчи ярим йилликда кичик ва ўрта бизнесга 76,5 трлн сўм миқдорида ресурс йўналтирилган.

Мамлакатда кредит хизматларининг ягона рақамли портали ҳам иш бошлади. Тадбиркор битта ариза топширади, шундан сўнг банклар унга кредит ажратиш учун рақобатлашади. Янги фаолият бошлаётган тадбиркорлар учун 5 млрд сўмгача бўлган кредитларни онлайн расмийлаштириш имконияти яратилади.

Президент бизнесни ривожланиш босқичига қараб қўллаб-қувватлашнинг ягона экотизими яратилишини маълум қилди. Янги тадбиркорлар учун «Бизнес-старт», ишлаб чиқариши йўлга қўйилган компаниялар учун «Бизнес-лифт», кейинги ўсиш босқичига ўтаётган корхоналар учун эса «Бизнес-юксалиш» дастурлари ишга туширилади.

«Бизнес-старт» доирасида тадбиркорларга сунъий интеллектдан фойдаланган ҳолда лойиҳалар ва кредит ҳужжатларини тайёрлаш, шунингдек, ҳисобот юритиш бўйича таълим берилади. Дастурни амалга ошириш учун 100 млрд сўм ажратилади. Иштирокчилар тайёр бизнес-режалар ва 200 млн сўмгача бўлган гаровсиз кредитлардан фойдаланиш имкониятига эга бўлади.

Шавкат Мирзиёев кичик бизнес учун тўсиқлардан бири бўлиб қолаётган гаров таъминоти муаммосига ҳам алоҳида тўхталди. Уни ҳал қилиш учун кредитлашда бизнеснинг ҳақиқий қийматини ҳисобга олиш имконини берувчи контркафолат механизмини жорий этиш режалаштирилмоқда.

10 млрд сўмгача бўлган кредитларда гаров таъминотининг 30 фоизини давлат, яна 30 фоизини Бизнесни кафолатлаш компанияси, 15 фоизини эса банклар қоплайди. Шу тариқа тадбиркор кредит суммасининг 25 фоизини мустақил равишда гаров билан таъминлаши керак бўлади.

Бундан ташқари, сунъий интеллект асосида яратилган «Виртуал солиқ маслаҳатчиси» (Soliq AI) портали ҳам ишга тушди. У тадбиркорларга харажатлар ва хатолар сонини камайтиришда ёрдам беришга мўлжалланган.

2027 йилдан бошлаб қурилиш, меҳнат муносабатлари, ташқи савдо ва давлат хизматлари соҳаларида ҳам шунга ўхшаш сунъий интеллект ёрдамчиларини жорий этиш режалаштирилмоқда.

Президент логистика ва ташқи савдони ривожлантириш билан боғлиқ бошқа чоралар ҳақида ҳам маълумот берди. 2027 йилда Ўзбекистон Грузиянинг Поти портида қуввати 500 минг тонна бўлган логистика марказини ишга тушириш ва Анаклия портида ишларни бошлашни режалаштирмоқда.

Бундан ташқари, юк автомобилларини импорт қилишда божхона божи ва утилизация йиғимини бекор қилиш, халқаро ташувлар учун вагонлар тақдим этилганда эса қўшилган қиймат солиғининг ноль ставкасини белгилаш режалаштирилмоқда.