Миразизбек Мирзахалилов Россияда IBF European камарини қўлга киритди

Тошкент, Ўзбекистон (UzDaily.uz) — 14 август куни Набережные Челны шаҳрида бўлиб ўтган IBA.Pro 20 турнирида ўзбекистонлик уч нафар боксчи ғалаба қозонди. Миразизбек Мирзахалилов IBF European чемпионлик камарини қўлга киритган бўлса, Ҳалимжон Мамасолиев ва Хавасбек Асадуллаев ўз жангларида ғалаба қозонди. Бу ҳақда Ўзбекистон бокс федерацияси хабар берди.

Мирзахалилов иккинчи енгил вазн — 55,3 килограммгача бўлган вазн тоифасида иштирок этди. IBF European титули учун 10 раундга мўлжалланган жангда унга мағлубиятга учрамаган россиялик боксчи Чингиз Натиров рақиблик қилди. Жангга қадар Натиров 10 та ғалабага эга бўлиб, уларнинг бештасини нокаут билан қўлга киритган эди.

Тўртинчи раунддан сўнг Натиров жангни давом эттира олмади. Мирзахалилов техник нокаут билан ғалаба қозониб, чемпионлик камарига эга бўлди. Ушбу жангдан сўнг унинг профессионал рекорди 5 та ғалабани ташкил қилди, уларнинг тўрттасида у рақибини нокаутга учратган.

Биринчи оғир вазн — 90,7 килограммгача бўлган тоифада Ҳалимжон Мамасолиев россиялик боксчи Герман Скобенко билан 10 раундлик жанг ўтказди.

Жанг якунига кўра, барча ҳакамлар бир овоздан Ўзбекистон вакилига ғалаба берди. Мамасолиев учун ушбу ғалаба профессионал фаолиятидаги саккизинчиси бўлди. У еттита жангни нокаут билан якунлаган.

Ўзбекистоннинг яна бир вакили Хавасбек Асадуллаев ярим ўрта вазн — 66,7 килограммгача бўлган тоифада иштирок этди. У россиялик Сергей Лубковичга қарши 10 раундлик жанг ўтказиб, унда ҳам ғалаба қозонди.

Шу тариқа, Набережные Челныдаги IBA.Pro 20 турнирида иштирок этган Ўзбекистоннинг уч нафар боксчиси ҳам ўз жангларини ғалаба билан якунлади.