Кюрасао Дик Адвокат бошчилигида Эквадор билан дуранг

Тошкент, Ўзбекистон (UzDaily.uz) — Кюрасао термаси Дик Адвокат бошчилигида Эквадор билан ЧМ-2026 доирасида дуранг ўйнади.

Футбол бўйича Кюрасао термаси гуруҳ босқичининг иккинчи турида Эквадор жамоасига қарши ўйинда 0:0 ҳисобида дуранг қайд этди. Учрашув АҚШнинг Миссури штатидаги Канзас-Сити шаҳрида бўлиб ўтди.

Кюрасао учун бу учрашув жаҳон чемпионатлари тарихидаги иккинчи ўйин бўлди, чунки жамоа жаҳон биринчиликларида энг кам аҳолига эга мамлакат сифатида иштирок этмоқда.

Дастлабки турда Кюрасао Германиядан 1:7 ҳисобида йирик мағлубият қабул қилган эди. Эквадор билан ўйинда қўлга киритилган бир очко эса орол давлати учун тарихий аҳамият касб этди.

Икки турдан сўнг Германия 6 очко билан E гуруҳини якка ўзи бошқармоқда ва плей-офф босқичига чиқишни кафолатлаган. Кот-д'Ивуар 3 очко билан иккинчи ўринда жойлашган. Эквадор ва Кюрасао эса бир очкодан тўплаб, мос равишда учинчи ва тўртинчи ўринларни бўлишиб турибди.

Плей-оффга чиқиш учун қолган йўлланмалар тақдири 25 июнь куни бўлиб ўтадиган сўнгги турда ҳал этилади. Унда Эквадор гуруҳ етакчиси Германияга қарши майдонга тушади, Кюрасао эса Кот-д'Ивуар билан ўйнайди.

АҚШ, Канада ва Мексикада ўтаётган ушбу турнир регламентига кўра, 12 гуруҳдан икки тадан энг яхши жамоа, шунингдек, учинчи ўринни эгаллаган энг яхши 8 жамоа 1/16 финалга йўл олади. 48 жамоа иштирок этаётган тарихдаги илк жаҳон чемпионати финали 19 июлга белгиланган.