Каннаваро Ўзбекистоннинг Португалиядан мағлубиятини баҳолади

Тошкент, Ўзбекистон (UzDaily.uz) — Ўзбекистон миллий терма жамоаси бош мураббийи Фабио Каннаваро жаҳон чемпионати гуруҳ босқичи иккинчи турида Португалияга қарши учрашувдан кейин ўтказилган расмий матбуот анжуманида иштирок этди. Мазкур баҳсда ўзбекистонлик футболчилар рақибга 0:5 ҳисобида имкониятни бой беришди.

Италиялик мутахассис республика тарихидаги илк жаҳон чемпионати иштирокининг осон кечиши мумкин эмаслигини таъкидлади. Унинг сўзларига кўра, қуръа натижасида К гуруҳидан Португалия ва Колумбия каби кучли жамоалар ўрин олганидан кейин мураббийлар штаби ва футболчилар мусобақанинг нақадар мураккаб бўлишини яхши англаб етган эди.

Йирик ҳисобдаги мағлубиятга қарамасдан, Фабио Каннаваро ўз шогирдларини қўллаб-қувватлади ва Колумбияга қарши илк учрашувдан кейин қандай фахр туйғусини ҳис қилган бўлса, бугун ҳам жамоасидан шундай ғурурланишини айтди. Бош мураббий ўзбекистонлик футболчилар майдонда жиддий қийинчиликларга дуч келганига қарамай, матонат кўрсатгани ва сўнгги ҳуштакка қадар курашни тўхтатмаганини алоҳида таъкидлади.

Италиялик мураббий рақиб жамоага ҳам муносиб баҳо берди. Унинг таъкидлашича, ҳар бир чизиғида юқори савияли футболчилар жамланган жамоага қарши ўйнаш ҳар доим жуда қийин ҳисобланади.

Каннаваро шунингдек, Португалия терма жамоаси баҳсга юқори даражадаги мотивация билан чиққанини қайд этди. Бироқ у Ўзбекистон терма жамоаси учун дебют жаҳон чемпионатидаги ҳар бир учрашув келажакдаги профессионал ўсиш учун зарур бўлган беқиёс халқаро тажриба вазифасини ўтаётганини таъкидлади.