Канада ЖЧ тарихида илк бор очко қўлга киритди

Тошкент, Ўзбекистон (UzDaily.uz) — АҚШ, Канада ва Мексикада ўтаётган 2026 йилги футбол бўйича жаҳон чемпионатида турнир мезбонларидан бири учун тарихий натижа қайд этилди. Канада миллий терма жамоаси гуруҳ босқичининг биринчи тур учрашувида Босния ва Герцеговина жамоаси билан дуранг ўйнади.

В квартети доирасида Торонтода бўлиб ўтган баҳс 1:1 ҳисобида якунланди. Ушбу натижа орқали Канада терма жамоаси ўз тарихида илк бор жаҳон чемпионатлари финал босқичида очко жамғаришга муваффақ бўлди. Бундан аввал жамоа 1986 ва 2022 йилги жаҳон чемпионатларида иштирок этган, аммо ўтказилган олтита учрашувнинг барчасида мағлуб бўлган эди.

Ўйинда ҳисоб 21-дақиқада меҳмонлар томонидан очилди — Босния ва Герцеговина сафида Йово Лукич аниқ зарба билан гол урди. Ушбу гол ҳужумчи учун миллий терма жамоа сафидаги тўртинчи учрашувидаги илк гол бўлди. Канада иккинчи бўлимда ҳисобни тенглаштиришга эришди. 78-дақиқада майдонга захирадан тушган Кайл Ларин биринчи тегинишнинг ўзида рақиб дарвозасини ишғол қилди.

Гуруҳ босқичининг иккинчи тур ўйинлари 18 июнь кунига белгиланган. Унда Канада терма жамоаси Ванкувер шаҳрида Қатар жамоасига қарши майдонга тушади. Босния ва Герцеговина эса АҚШнинг Инглвуд шаҳрида Швейцария терма жамоаси билан баҳс олиб боради.

Жорий жаҳон чемпионати футбол тарихида илк бор 48 та миллий терма жамоа иштирокида ва бир вақтнинг ўзида уч мамлакат стадионларида ўтказилмоқда. Сайёрамизнинг бош футбол турнири 19 июль куни бўлиб ўтадиган финал учрашуви билан якунланади. Амалдаги жаҳон чемпиони мақомини Аргентина терма жамоаси ҳимоя қилмоқда.