Ҳасанбой Дўсматов “Golden Gloves” билан шартнома имзоламаган

Тошкент, Ўзбекистон (UzDaily.uz) -- Бокс бўйича Олимпия чемпиони ва “Вэл Баркер Кубоги” соҳиби Ҳасанбой Дўсматов ЖАРнинг “Golden Gloves” промоутерлик компанияси билан профессионал шартнома имзоламаган.

Ҳасанбой Дўсматовнинг “Sports.uz” сайтига хабар беришича, у компаниянинг раҳбари Родни Берман билан таниш эмас. Унинг қайд этишича, у ҳеч қандай компания билан шартнома имзоламаган.

Ҳ.Дўсматовнинг сўзларига кўра, у WSB ярим профессионал мусобақасида “Uzbek Tigers” жамоаси шарафини ҳимоя қилишда давом этади. Кейинчалик эса Токиода ўтадиган навбатдаги Олимпиадада ўз унвонини ҳимоя қилишни режалаштирган.