Каннаваро ЖЧдан кейин Италияга нега борганини тушунтирди / Фото: Видеодан кадр.

Тошкент, Ўзбекистон (UzDaily.uz) — Ўзбекистон миллий терма жамоаси бош мураббийи Фабио Каннаваро жаҳон чемпионати якунланганидан сўнг дарҳол Италияга дам олиш учун кетгани ҳақидаги хабарларни рад этди.

Матбуот анжуманида италиялик мутахассис миллий терма жамоа Нью-Йоркда бўлган вақтнинг охиригача жамоа билан бирга бўлганини, Ўзбекистон чемпионатидаги танаффус пайтидагина қисқа муддатга уйига бориб келганини таъкидлади.

«Жаҳон чемпионатидан кейин мен дарҳол Италияга дам олиш учун учиб кетганим ҳақида гап-сўзлар тарқалди. Бу ҳақиқат эмас. Алоҳида таъкидламоқчиманки, энг охиригача Нью-Йоркдаги меҳмонхонада Ўзбекистон терма жамоаси билан бирга бўлдим. Суперлигадаги танаффус сабабли ҳақиқатдан ҳам қисқа муддатга уйимга бориб келдим. Ўзбекистон чемпионати қайта бошланиши биланоқ қайтиб келдим ва учрашувларни диққат билан кузатишда давом этяпман», — деди Каннаваро.

Бош мураббий яна бир неча ой аввал ҳам жамоа жаҳон чемпионатида дуч келиши мумкин бўлган муаммолар ҳақида огоҳлантирганини таъкидлади.

Унинг сўзларига кўра, мураббийлар штаби доимий равишда ўйин шиддати ва майдонда қарор қабул қилиш тезлигини ошириш зарурлигига эътибор қаратган.

«Агар 8–9 ой олдинги даврга қайтсак, ўшандаёқ мавжуд муаммолар ва футболчиларимиз савияси ҳақида гапирганман. Суҳбатларимиз марказида ҳар доим ўйин шиддати турарди — биз доимо футболчилар юқори тезликда ҳаракат қилиши кераклигини таъкидлардик. Мен жаҳон чемпионатида ўйин суръати жуда юқори бўлишини тушунардим. Балки кўпчилик мундиалда қийинчиликларга дуч келмаймиз, деб ўйлагандир, аммо мен бу ҳақда олдиндан огоҳлантирганман», — деди Каннаваро.