GS-BIO Наманганда картошка уруғчилиги лабораториясини очади
Тошкент, Ўзбекистон (UzDaily.uz) — Жанубий Кореянинг агробиотехнология компанияси GS-BIO Наманган вилоятида уруғлик картошка етиштиришни ривожлантириш мақсадида замонавий лаборатория ташкил этишни режалаштирмоқда. Компания раҳбари Ким Вон Хён бошчилигидаги делегация ушбу соҳада ҳамкорлик масалаларини муҳокама қилиш учун вилоятга ташриф буюрди. Бу ҳақда Наманган вилояти ҳокимлиги ахборот хизмати хабар берди.
Наманган вилояти ҳокими Шавкатжон Абдураззоқов GS-BIO раҳбари билан учрашув ўтказди. Томонлар уруғлик картошка етиштириш ва етказиб бериш, шунингдек, ушбу соҳада иссиқхона технологиялари ҳамда Smart Farm тизимларини жорий этиш имкониятларини муҳокама қилди.
GS-BIO замонавий уруғлик картошка етиштириш тизимини ривожлантириш учун инновацион ечимларга ихтисослашган. Компания фаолиятининг асосий йўналишларидан бири вируслардан холи картошка экиш материалини ишлаб чиқариш ҳисобланади.
Ҳокимлик маълумотига кўра, компания томонидан таклиф этилаётган ечимлар ҳосилдорлик ва маҳсулот сифатини ошириш, шунингдек, Ўзбекистон ва Марказий Осиёда уруғлик картошка ишлаб чиқаришнинг замонавий тизимини ривожлантиришга қаратилган.
Жанубий Корея компанияси вакиллари Наманган вилоятининг шароитлари ва имкониятларини инобатга олган ҳолда ҳамкорликни янада ривожлантиришдан манфаатдор эканини билдирди.
Айни пайтда томонлар вилоятнинг картошка етиштиришга ихтисослашган туманларидан бирида замонавий лаборатория ташкил этиш имкониятини ўрганмоқда.
