Фарғона аэропортида перронни таъмирлаш ишлари бошланди
Тошкент, Ўзбекистон (UzDaily.uz) — "Ўзбекистон аэропортлари" матбуот хизматининг хабар беришича, Фарғона халқаро аэропортида перронни капитал таъмирлаш ишлари бошланди.
Лойиҳа эскирган асфальт-бетон қопламасини тўлиқ алмаштириш, мустаҳкамлаш, шунингдек, перроннинг барча элементларини замонавий хавфсизлик ва фойдаланиш талабларига мувофиқ ҳолатга келтиришни ўз ичига олади.
Бундан ташқари, муҳандислик коммуникацияларини, жумладан, сув чиқариш тизимларини янгилаш ҳамда перрон ёритиш тизимини энергия тежамкор ва замонавий ускуналар ўрнатган ҳолда модернизация қилиш кўзда тутилган. Мазкур объектда охирги марта реконструкция ишлари 1991 йилда ўтказилган бўлиб, ўшандан бери капитал янгилаш ишлари бажарилмаган.
Капитал таъмирлашдан сўнг самолётлар турар жойи 9 тага етади. Бунга мавжуд майдонни қайта конфигурация қилиш: чизиқларни янгилаш, ҳаво кемаларининг жойлашишини оптималлаштириш, шунингдек, ёритиш мачталарининг ўрнини кўчириш ҳисобига эришилади.
