Депутатлар томонидан Тадбиркорлар ҳуқуқларини ҳимоя қилиш тўғрисидаги қонун қабул қилинди

Тошкент, Ўзбекистон (UzDaily.uz) — Мажлисда тадбиркорларнинг ҳуқуқ ва манфаатларини таъминлашга қаратилган қонун лойиҳаси депутатлар томонидан иккинчи ўқишда муҳокама қилинди.

Қонун лойиҳаси билан Иқтисодий процессуал ҳамда Солиқ кодексларига ўзгартириш ва қўшимчалар киритилмоқда. Жумладан, солиқ тўловчи бўлган тадбиркорлик субъекти ўзининг солиққа оид ҳуқуқбузарлигини тан олганда ва эътироз билдирмаганда, тадбиркорнинг банкдаги ҳисобварақлари бўйича операцияларни тўхтатиб туриш солиқ органлари томонидан амалга оширилиши белгиланмоқда.

Ҳуқуқбузарлик бартараф этилганда ҳисобварақ фаолиятига қўйилган чекловни бекор қилиш ҳам солиқ органи томонидан амалга оширилиши таклиф этиляпти. Эндиликда қоидабузилиш тан олинса иш судгача бормайди. Киритилаётган мазкур ўзгартиришлар қоидабузилишларни тез фурсатда бартараф қилиш ва тадбиркор фаолиятини қисқа вақтда қайта давом эттириш имконини беради.

Шу билан бирга, солиқ тўловчи солиқ органининг қарори юзасидан эътироз билдирса, унинг банкдаги ҳисобварақлари бўйича операцияларни тўхтатиб туриш солиқ органининг аризасига асосан Иқтисодий суд томонидан амалга оширилиши назарда тутилмоқда.

Зуҳриддин МАВЛОНОВ, Коррупцияга қарши курашиш ва суд-ҳуқуқ масалалари қўмитаси аъзоси: Қонун лойиҳасини иккинчи ўқишга тайёрлаш жараёнида депутатлар, экспертлар билдирган таклиф ва тавсиялар ишчи гуруҳ ҳамда қўмита аъзолари иштирокида батафсил кўриб чиқилиб, лойиҳа нормалари такомиллаштирилди. Ушбу ҳужжат тадбиркорлик субъектларининг ўз фаолиятини тезда тиклаш имкониятини чеклайдиган ортиқча тартиб-таомилларни бартараф этади, тадбиркорлик субъектлари фаолиятининг барқарорлигини таъминлайди.

Муҳокамалардан сўнг, қонун лойиҳаси депутатлар томонидан қабул қилинди ва Сенатга юборилди.