Чорвоқ сув омборида уч кишидан бирининг жасади топилди

Тошкент, Ўзбекистон (UzDaily.uz) — Ўзбекистон Фавқулодда вазиятлар вазирлиги қутқарувчилари 9 сентябрь куни 2 сентябрь куни Чорвоқ сув омборида чўкиб кетган уч эркакдан бирининг жасадини топди. Қолган икки кишини қидириш ишлари давом этмоқда.

Фожиа Тошкент вилояти Бўстонлиқ туманидаги «Бурчмулла» маҳалласи ҳудудида содир бўлган. Ота ва унинг икки ўғли катерда сайр қилиш учун йўлга чиққан. Шундан сўнг улар чўмилиш тақиқланган ҳудудга бориб қолган ва қутқарув жилетларисиз сувга тушган. Учаласи ҳам чўкиб кетган.

Ҳодиса ҳақида хабар келиб тушгач, воқеа жойига Фавқулодда вазиятлар вазирлигининг ғаввос-қутқарувчилари етиб борган. Улар қидирув ишларини бошлаган.

Сув ҳавзасининг катта майдони ва сув омборининг чуқурлиги инобатга олиниб, ишларга Жиззах ва Сирдарё вилоятларидан қўшимча қутқарув кучлари жалб қилинган. Воқеа жойида махсус штаб ташкил этилган. Сув омборини текшириш учун зарур техника ва замонавий ускуналардан фойдаланилмоқда.

9 сентябрь куни соат 13:02 да қутқарувчилар ҳалок бўлган эркаклардан бирининг жасадини аниқлади.

Қидирув-қутқарув операцияси давом этмоқда. ФВВ мутахассислари оиланинг қолган икки аъзосини қидириш ишларини давом эттирмоқда.