Тошкент, Ўзбекистон (UzDaily.uz) — Central Eurasian Venture Forum (CEVF) 2027 йил апрель ойида яна Ўзбекистонда ўтказилади. MOST Holding ва IT Park Uzbekistan ICT Week Uzbekistan 2026 доирасида тегишли меморандумни имзолади.
Форум мамлакатда иккинчи йил кетма-кет ўтказилади. Томонлар Марказий Евроосиё венчур бозорини ривожлантириш, халқаро капитални жалб қилиш ҳамда минтақа инвесторлари, технологик компаниялар ва стартаплар ўртасидаги ҳамкорликни мустаҳкамлаш бўйича ҳамкорликни давом эттириш ниятида.
2026 йилда CEVF илк бор Ўзбекистонда ўтказилиб, 800 дан ортиқ иштирокчини жамлаган. Улар орасида 260 дан зиёд тадбиркор, 200 нафар стартап вакили, 140 нафар хусусий инвестор ҳамда 60 дан ортиқ корпорация вакиллари бўлган.
Тадбирда, шунингдек, бошқарувидаги капиталнинг умумий ҳажми ва капитализацияси 6 млрд доллардан ошадиган 40 дан ортиқ фонд, бошқарув компанияси ва ривожланиш институти вакиллари иштирок этган.
CEVF 2027 MOST Holding ва IT Park Uzbekistan ўртасидаги ҳамкорликнинг давоми бўлади. Форумда минтақавий венчур экотизими билан халқаро инвестиция ҳамжамияти ўртасидаги алоқаларни ривожлантириш, капитал жалб қилиш ва технологик компанияларнинг хорижий бозорларга чиқиш имкониятларини кенгайтиришга асосий эътибор қаратилади.
CEVF дастуридан инвестиция битимлари, халқаро ҳамкорлик, трансчегаравий алоқаларни ривожлантириш ва стартапларни янги бозорларга олиб чиқиш масалалари ўрин олган. Форум иштирокчилари венчур фондлар, институционал ва хусусий инвесторлар, технологик компаниялар асосчилари, корпорациялар, давлат тузилмалари ва ривожланиш институтларидан иборат бўлади.
CEVF 2027 га тайёргарлик доирасида Марказий Евроосиё венчур фондларининг амалдаги ва янги бошқарувчилари учун GP Academy’ни ишга тушириш ҳам режалаштирилмоқда. Дастур фондларни ташкил этиш ва бошқариш, институционал инвесторлар капиталини жалб қилиш, Limited Partners билан ишлаш, инвестиция битимларини баҳолаш ва портфель компанияларини ривожлантириш масалаларига бағишланади.
IT Park Uzbekistan бош директори Азамат Караматовнинг таъкидлашича, CEVFнинг иккинчи йил кетма-кет ўтказилиши Ўзбекистон стартапларининг халқаро инвесторлар билан алоқаларини ривожлантириш ва хорижий фондларнинг маҳаллий бозорга қизиқишини ошириш бўйича ишларни давом эттириш имконини беради.
MOST Holding бош директори Павел Коктишевнинг билдиришича, 2027 йилда ташкилотчилар халқаро инвесторларнинг қизиқишини тадбиркорлар учун аниқ учрашувлар, битимлар ва янги имкониятларга айлантиришга эътибор қаратишни режалаштирмоқда.
CEVF 2027нинг аниқ санаси, ўтказилиш жойи, дастури ва халқаро иштирокчилар таркиби қўшимча равишда эълон қилинади.
