Тошкент, Ўзбекистон (UzDaily.uz) — Ўзбекистон ва Туркия қишлоқ хўжалиги соҳаси учун мутахассислар тайёрлаш ҳамда замонавий агротехнологияларни жорий этиш соҳасидаги ҳамкорликни кенгайтириш ниятида. Бу ҳақда Ўзбекистон Қишлоқ хўжалиги вазирлиги хабар берди.
Қишлоқ хўжалиги соҳаси кадрларини қайта тайёрлаш ва уларнинг малакасини ошириш институтида Туркиянинг TAYSEN GIDA TARIM HAYV. TUR. MAK. SAN. VE TİC. LTD. ŞTİ. компанияси вакиллари билан учрашув бўлиб ўтди.
Учрашувда Умут Эфенди, Абидан Килич ва Уғур Эрилмаз иштирок этди.
Томонлар иссиқхона шароитида қўзиқорин, қулупнай, помидор ва бодринг етиштириш бўйича мутахассислар малакасини ошириш, шунингдек, боғдорчиликни ривожлантириш масалаларини муҳокама қилди. Замонавий етиштириш технологияларини ўрганиш ва хорижий тажрибани амалиётда қўллашга алоҳида эътибор қаратилди.
Бундан ташқари, иштирокчилар ихтисослаштирилган малака ошириш курслари, амалий семинарлар, маҳорат дарслари ва тажриба алмашиш дастурларини ўтказиш имкониятини кўриб чиқди.
Учрашув якунлари бўйича аграр соҳа мутахассисларининг амалий билим ва кўникмаларини ошириш, замонавий агротехнологияларни ўзлаштириш ҳамда илғор турк тажрибасини Ўзбекистонда жорий этиш соҳаларида ҳамкорликни давом эттириш бўйича келишувга эришилди.
Кутилишича, ҳамкорлик институтнинг халқаро алоқаларини кенгайтириш ҳамда замонавий касбий билим ва амалий кўникмаларга эга қишлоқ хўжалиги мутахассисларини тайёрлашга хизмат қилади.
