Тошкент, Ўзбекистон (UzDaily.uz) — Uzbekistan Airways ва Дубайда жойлашган Flydubai авиакомпанияси интерлайн келишувини имзолади. Ушбу келишув икки авиакомпаниянинг йўналишлар тармоғини бирлаштириб, Дубай ва Тошкент орқали саёҳат қилиш имкониятларини кенгайтиради. Бу ҳақда авиакомпаниялар хабар берди.
Uzbekistan Airways йўловчилари Дубайда қўниш орқали Flydubai’нинг 40 дан ортиқ йўналишига чиқиш имкониятига эга бўлади. Flydubai йўловчилари эса Тошкент орқали Uzbekistan Airways йўналишлар тармоғидан фойдаланиб, Ўзбекистон, Россия ва Европа шаҳарларига сафарини давом эттириши мумкин.
2026 йил 21 сентябрдан бошлаб Uzbekistan Airways’нинг расмий сайтида Дубайда уланиш билан амалга ошириладиган парвоз вариантлари пайдо бўлади. Улар орасида авиакомпаниянинг аввалги йўналишлар тармоғига кирмаган Аддис-Абеба, Найроби ва Занзибар йўналишлари ҳам бўлади. Шунингдек, йўловчиларга Аммон, Баҳрайн, Доҳa, Пиза, Неаполь, Масқат, Салала ва Мале йўналишлари ҳам тақдим этилади.
Flydubai йўловчилари учун янги имкониятлар 15 сентябрдан бошлаб мавжуд бўлади. Улар Тошкент орқали Россиянинг Иркутск ва Красноярск шаҳарларига, шунингдек, Франкфурт, Лондон, Милан, Мюнхен, Париж ва Римга сафарини давом эттириши мумкин. Бундан ташқари, Uzbekistan Airways йўналишлар тармоғи Flydubai йўловчиларига Тошкент орқали Бухоро, Фарғона ва Урганчга етиб бориш имконини беради.
Интерлайн келишуви доирасида йўловчилар бутун йўналиш учун ягона чипта расмийлаштириши, багажни эса якуний манзилгача рўйхатдан ўтказиши мумкин. Йўналишнинг барча сегментлари учун ягона посадка талонини расмийлаштириш имконияти кейинроқ жорий этилади.
«Uzbekistan Airways» АЖ бошқарув раиси Шуҳрат Худойқуловнинг таъкидлашича, келишув икки авиакомпаниянинг йўналишлар тармоғини бирлаштириш, йўналишлар танловини кенгайтириш ва халқаро сафарларни янада қулайлаштириш имконини беради.
Flydubai ижрочи директори Гейт Ал Гейтнинг қайд этишича, ҳамкорлик БАА ва Ўзбекистон ўртасида саёҳат қилиш имкониятларини кенгайтиради. Унинг сўзларига кўра, авиакомпания 2019 йилда Тошкентга парвозларни йўлга қўйганидан буён икки мамлакат ўртасидаги сафарларга барқарор талаб кузатилмоқда.
Айни вақтда Flydubai’нинг йўналишлар тармоғи 56 та давлатдаги 125 дан ортиқ йўналишни қамраб олади. Авиакомпания флоти 95 дан ортиқ Boeing 737 самолётидан иборат.
Янги йўналишлар бўйича чипталар савдоси Flydubai томонида 15 сентябрдан, Uzbekistan Airways’нинг расмий сайтида эса 21 сентябрдан бошланади.
