Бухоролик туроператорлар Сурхондарё салоҳиятини ўрганди

Тошкент, Ўзбекистон (UzDaily.uz) — Бухоро вилоятининг етакчи туроператорлари учун Сурхондарё вилояти бўйлаб ахборот тури ташкил этилди. Ташаббус ҳудуднинг сайёҳлик салоҳиятини тарғиб қилиш ва ҳудудлараро ҳамкорликни ривожлантиришга қаратилган.

Сафар давомида Бухоро сайёҳлик бизнеси вакиллари Сурхондарёнинг тарихий-маданий мерос объектлари, қадимий зиёратгоҳлари, табиий ва экотуристик диққатга сазовор жойлари, шунингдек, вилоятнинг сайёҳлик инфратузилмаси билан танишди.

Инфотур иштирокчиларига амалдаги сайёҳлик йўналишлари, мавжуд имкониятлар ва ҳудудда соҳани ривожлантиришнинг истиқболли йўналишлари ҳақида маълумот берилди.

Сафар доирасида Бухоро ва Сурхондарё вилоятлари туроператорларининг учрашуви ҳам бўлиб ўтди. Томонлар қўшма сайёҳлик пакетларини ишлаб чиқиш, туристик маҳсулотларни ўзаро тарғиб қилиш ва ҳудудлар ўртасидаги сайёҳлар оқимини ошириш масалаларини муҳокама қилди.

Учрашув якунлари бўйича иштирокчилар янги сайёҳлик йўналишларини йўлга қўйиш ва икки вилоят туроператорлари ўртасидаги амалий ҳамкорликни кенгайтиришни таклиф қилди. Бухоро вилоятидан Сурхондарёга йўл оладиган сайёҳлар сонини оширишга алоҳида эътибор қаратилди.

Ташкилотчилар инфотур Бухоро ва Сурхондарёнинг сайёҳлик имкониятларини ўзаро тарғиб қилиш, туризм бизнеси вакиллари ўртасидаги ҳамкорликни мустаҳкамлаш ҳамда ички туризм йўналишларини кенгайтиришга хизмат қилади, деб кутмоқда.