Тошкент, Ўзбекистон (UzDaily.uz) — Ўзбекистон 14–16 октябрь кунлари Италиянинг Римини шаҳрида бўлиб ўтаётган TTG Travel Experience 2026 халқаро туристик кўргазмасида иштирок этмоқда. Мамлакатнинг миллий стенди Ўзбекистон Республикаси Туризм қўмитаси томонидан ташкил этилган.
Кўргазманинг биринчи кунида миллий стенднинг очилиш маросими бўлиб ўтди. Унда иштирок этиш Ўзбекистоннинг туристик имкониятларини хорижда тарғиб қилиш, мамлакатнинг саёҳат учун жозибадор йўналиш сифатидаги имижини мустаҳкамлаш ва хорижий ҳамкорлар билан ҳамкорликни кенгайтиришга қаратилган.
Миллий стендда Ўзбекистоннинг 16 та туроператори, шунингдек, Uzbekistan Airways авиакомпанияси вакиллари иштирок этмоқда.
Кўргазманинг биринчи кунида улар хорижий туроператорлар, туристик компаниялар ва соҳага алоқадор бошқа иштирокчилар билан B2B форматида 400 га яқин учрашув ўтказди.
Музокаралар янги ишбилармонлик алоқаларини ўрнатиш, ҳамкорлик муносабатларини шакллантириш ва Ўзбекистонга ташриф буюрувчи хорижий сайёҳлар сонини оширишга қаратилган келишувларни тайёрлашга хизмат қилади.
Экспозициядан мамлакатнинг туристик имкониятлари ҳақидаги реклама ва ахборот материаллари, видеороликлар ҳамда миллий ҳунармандчилик буюмлари ҳам ўрин олган.
Кўргазма ташриф буюрувчилари Ўзбекистоннинг тарихий-маданий мероси, анъаналари ва маданий қадриятлари билан танишиш, шунингдек, туризмнинг турли йўналишларини ривожлантириш имкониятлари ҳақида маълумот олишлари мумкин.
TTG Travel Experience 2026 кўргазмасида иштирок этиш Ўзбекистоннинг халқаро туристик бозордаги мавқеини мустаҳкамлаш, Италия ва бошқа мамлакатлар билан ҳамкорликни кенгайтириш имконияти сифатида баҳоланмоқда. Кўргазма 16 октябрга қадар давом этади.
