Бухорода туман ҳокими ўринбосари пора билан ушланди

Тошкент, Ўзбекистон (UzDaily.uz) — Бухоро вилоятида туман ҳокимининг ўринбосари йирик миқдорда пора олганликда гумон қилиниб қўлга олинди. Бу ҳақда Ўзбекистон Давлат хавфсизлик хизмати матбуот хизмати хабар қилди.

Идора маълумотларига кўра, Бухоро туманида шартнома асосида қишлоқ хўжалиги фаолияти билан шуғулланувчи фермер амалдорга «Қум Султон» массивида жойлашган экин майдонларига сув етказиб беришни қайта тиклашда ёрдам сўраб мурожаат қилган. Қайд этилишича, ушбу майдонларга Когон тумани ҳудуди орқали сув бериш тўхтатилган бўлган.

Тергов маълумотларига кўра, ҳоким ўринбосари сув таъминотини қайта тиклаш ва келгусида бундай муаммолар юзага келмаслигини таъминлашни ваъда қилган. Бу хизматлари эвазига у 15 минг АҚШ доллари талаб қилган.

Мансабдор пул маблағларини олаётган вақтда қўлга олинган.

Унга нисбатан Ўзбекистон Жиноят кодексининг 210-моддаси 2-қисми «б» ва «в» бандлари билан пора олиш ҳолати юзасидан жиноят иши қўзғатилган.

Ҳозирда тергов ҳаракатлари олиб борилмоқда.