Тошкент, Ўзбекистон (UzDaily.uz) — Санкт-Петербург шаҳридаги Давлат Эрмитажида «Сарой хоналарини кашф этиб: Бухоро амири саройидаги санъат» кўргазмаси ўз ишини якунлади. Дастлабки маълумотларга кўра, тўрт ой давом этган кўргазмага қарийб 110 минг киши ташриф буюрган. Бу ҳақда Ўзбекистон Маданият ва санъатни ривожлантириш жамғармаси хабар берди.
Экспозиция Ўзбекистоннинг етакчи музей муассасалари ва Давлат Эрмитажи тўпламларидан олинган 75 та музей ашёсини бирлаштирди. Намойиш этилган материаллар ташриф буюрувчиларни Бухоро амирлигининг бадиий маданияти, сарой турмуши анъаналари, шунингдек, Марказий Осиёнинг амалий-безак ва заргарлик санъати билан таништирди.
Кўргазма сарой маданияти ва минтақанинг бадиий анъаналари хусусиятларини акс эттирувчи музей ашёлари орқали Бухоро амирлигининг маданий меросини намойиш этиш имконини берди.
Ўзбекистон Маданият ва санъатни ривожлантириш жамғармаси Давлат Эрмитажи бош директори Михаил Пиотровскийга, шунингдек, кўргазмани тайёрлаш ва ўтказишда иштирок этган ҳамкорлар ҳамда мутахассисларга миннатдорлик билдирди.
Жамғарма кўргазма лойиҳасини муваффақиятли амалга оширишда барча иштирокчиларнинг ҳиссасини алоҳида қайд этди.
