Бразилия Гаитини мағлуб этди, Туркия ЖЧ билан хайрлашди

Тошкент, Ўзбекистон (UzDaily.uz) — Бразилия терма жамоаси футбол бўйича жаҳон чемпионати гуруҳ босқичининг иккинчи турида Гаити терма жамоасини 3:0 ҳисобида ишончли тарзда мағлуб этди. Учинчи гуруҳ доирасидаги учрашув Филадельфия шаҳрида бўлиб ўтди.

Бразилияликлар сафида Матеус Кунья дубль муаллифи бўлди. У 23 ва 36-дақиқаларда гол урди. Яна бир тўпни биринчи бўлимга қўшиб берилган вақтда Винисиус Жуниор киритди. Учрашув давомида Бразилия терма жамоаси ярим ҳимоячиси Рафинья жароҳат олиб, 40-дақиқада майдонни тарк этди.

Икки тур натижаларига кўра, Бразилия терма жамоаси тўрт очко тўплаб, С гуруҳида биринчи ўринга кўтарилди. Марокаш ҳисобида ҳам тўрт очко бор. Шотландия уч очко билан учинчи ўринда бормоқда. Қатор иккинчи мағлубиятини қабул қилиб олган Ғаити эса 1/16 финалга чиқиш имкониятини йўқотди.

Ўйин кунининг яна бир баҳсида Туркия терма жамоаси Парагвайга 0:1 ҳисобида мағлуб бўлди. Учрашувдаги ягона гол 64-сонияда киритилди. Унинг муаллифи Матиас Галарса бўлиб, турнир тарихидаги энг тезкор гол муаллифига айланди. Аввалги рекорд бир суткадан кам вақт сақланиб, Марокаш футболчиси Исмаэль Сайбарига тегишли эди. У Шотландияга қарши баҳснинг 71-сониясида гол урганди.

Биринчи бўлим охирида Парагвай ҳужумчиси Мигель Альмирон қизил карточка олгач, жамоаси бир киши кам бўлиб қолди. Шунга қарамай, сон жиҳатдан устунликка эга бўлган Туркия ҳисобни тенглаштира олмади ва турнирдаги иккинчи мағлубиятини қабул қилди.

Тур натижаларига кўра, Туркия терма жамоаси плей-оффга чиқиш имкониятини йўқотди ва Ғаитидан кейин гуруҳ босқичи якунланиши билан чемпионлик учун курашни эрта тугатадиган иккинчи жамоага айланди.

D гуруҳида АҚШ терма жамоаси етакчилик қилмоқда. Жамоа ҳар икки учрашувда ғалаба қозониб, плей-офф босқичига чиқишни кафолатлади.

С ва D гуруҳларидаги сўнгги учрашувлар Москва вақти билан 26 июнга ўтар кечаси бўлиб ўтади. Жаҳон чемпионати АҚШ, Канада ва Мексикада ўтказилмоқда ҳамда тарихда илк бор 48 та терма жамоа иштирок этмоқда. Турнир 19 июль куни якунланади. Амалдаги жаҳон чемпиони Аргентина терма жамоаси ҳисобланади.