Бельгия АҚШни мағлуб этиб, чорак финалга чиқди

Тошкент, Ўзбекистон (UzDaily.uz) — Бельгия терма жамоаси 2026 йилги футбол бўйича жаҳон чемпионати 1/8 финалида АҚШни 4:1 ҳисобида ишончли тарзда мағлуб этиб, мусобақанинг чорак финалига йўлланмани қўлга киритди.

Учрашув Сиэтл шаҳрида бўлиб ўтди. Бельгияга ғалабани Шарль де Кетеларенинг 9 ва 33-дақиқаларда киритган иккита голи, шунингдек, 57-дақиқада Ханс Ванакен ҳамда иккинчи бўлимга қўшиб берилган вақтда Ромелу Лукаку урган голлар таъминлади.

АҚШ терма жамоасининг ягона голига 31-дақиқада Малик Тиллман муаллифлик қилди.

Босния ва Герцеговинага қарши аввалги учрашувда майдондан четлатилганига қарамай, АҚШ ҳужумчиси Фоларин Балогун ўйинни асосий таркибда бошлади. Халқаро футбол федерациясининг интизом қўмитаси унинг дисквалификациясини вақтинча тўхтатди.

Чорак финалда Бельгия Испания терма жамоасига қарши майдонга тушади. Учрашув 10 июль куни бўлиб ўтади.

Бельгия терма жамоаси ўз тарихида тўртинчи марта жаҳон чемпионати чорак финалига чиқмоқда. Жамоа 1986 йилги мундиалда тўртинчи ўринни эгаллаган, 2014 йилда чорак финалда иштирокини якунлаган, 2018 йилда эса бронза медалларини қўлга киритган. Аввалги жаҳон чемпионатида бельгияликлар гуруҳ босқичидан чиқа олмаган эди.

АҚШ терма жамоаси эса 2002 йилдан бери илк бор жаҳон чемпионати чорак финалига чиқа олмади. 2010 йилдан буён америкаликлар тўртинчи марта мусобақани 1/8 финал босқичида тарк этмоқда.

2026 йилги жаҳон чемпионати АҚШ, Канада ва Мексикада ўтказилмоқда. Турнир тарихида илк бор унда 48 та миллий терма жамоа иштирок этмоқда. Финал учрашуви 19 июль куни бўлиб ўтади.