Беларусь ва Ўзбекистон стандартлар соҳасида ҳамкорлик қилади
Тошкент, Ўзбекистон (UzDaily.uz) — Беларусь ва Ўзбекистон техник тартибга солиш, жумладан, стандартлаштириш ва метрология соҳаларидаги ҳамкорликни фаоллаштиришни режалаштирмоқда. Ҳамкорлик масалаларини Беларусь Давлат стандарти раиси Елена Моргунова ва Ўзбекистоннинг Беларусдаги элчиси Нуриддин Мамажонов муҳокама қилди. Бу ҳақда Беларусь идораси матбуот хизмати хабар берди.
Давлат стандартида қайд этилишича, икки давлат муносабатлари стратегик шериклик форматида ривожланмоқда. Томонлар олдига 2030 йилга қадар ўзаро товар айирбошлаш ҳажмини 2 млрд долларга етказиш вазифаси қўйилган.
Идора вакилларининг таъкидлашича, техник тартибга солиш тизимини ривожлантириш савдо-иқтисодий ҳамкорлик учун бевосита аҳамиятга эга. Нуриддин Мамажонов мазкур соҳани икки давлат ўртасидаги ҳамкорликнинг асосий йўналишларидан бири эканини таъкидлади.
Учрашув давомида томонлар амалдаги ҳамкорлик натижалари ва истиқболли йўналишларни кўриб чиқди. Ҳамкорликнинг меъёрий-ҳуқуқий базаси қарийб 20 та келишувни қамраб олади.
Асосий эътибор ўзаро товар етказиб бериш учун шарт-шароит яратишга, жумладан, савдо учун сезгир бўлган йўналишлар ва истиқболли товар позицияларига қаратилиши режалаштирилмоқда.
Томонлар, шунингдек, икки давлат экспертлари ва бизнес вакиллари иштирокида техник тартибга солиш бўйича онлайн-семинар ўтказишга келишиб олди. Бундай тадбирга эҳтиёж Ўзбекистонда техник тартибга солиш тизими ислоҳ қилинаётгани билан боғлиқ. Иштирокчилар амалга оширилаётган ўзгаришлар ҳақида бевосита мутахассислардан маълумот олиш имконига эга бўлади.
Учрашувда мутахассисларни тайёрлаш ва уларнинг малакасини ошириш соҳасидаги ҳамкорлик масаласига ҳам алоҳида эътибор қаратилди. Ўзбекистон томони метрология соҳасида тажриба алмашишга қизиқиш билдирди.
Елена Моргунова Беларусь Давлат стандарти ҳамкорликни ривожлантириш, салоҳият ва амалий тажриба алмашишга кўмаклашишга тайёр эканини билдирди.
Унинг сўзларига кўра, ҳамкорликни фаоллаштириш икки давлат ўртасидаги савдо-иқтисодий ва кооперация алоқаларини янада ривожлантиришга хизмат қилиши керак.
