Албания президенти расмий ташриф билан Тошкентга келди

Тошкент, Ўзбекистон (UzDaily.uz) — Албания Республикаси Президенти Байрам Бегай турмуш ўртоғи билан бирга расмий ташриф билан Тошкент шаҳрига келди.

Пойтахт халқаро аэропортида Албания раҳбарини Олий Мажлис Қонунчилик палатаси спикери Нуриддин Исмоилов ҳамда бошқа расмий шахслар кутиб олди.

Ўзбекистонда бўлиш давомида олий даражадаги музокаралар ўтказилиши режалаштирилган. Ўзбекистон ва Албания президентлари Шавкат Мирзиёев ҳамда Байрам Бегай икки томонлама ҳамкорликни турли йўналишларда янада ривожлантириш истиқболларини муҳокама қилади.

Музокаралар кун тартибига халқаро сиёсат масалалари, жумладан, икки мамлакатнинг кўп томонлама майдонлардаги ҳамкорлиги ва ўзаро қўллаб-қувватлаши билан боғлиқ масалалар ҳам киритилган.

Шунингдек, Албания президенти Ўзбекистон пойтахтида ўтаётган юбилей V Тошкент халқаро инвестиция форумида иштирок этади.