Toshkent, O’zbekiston (UzDaily.uz) — Polshadagi Droxichin shahri ishbilarmon doiralari vakillari O‘zbekiston Savdo-sanoat palatasi bilan ikki mamlakat kompaniyalari o‘rtasida to‘g‘ridan-to‘g‘ri aloqalar o‘rnatish hamda savdo-iqtisodiy hamkorlikni kengaytirish istiqbollarini muhokama qildi.
Polsha delegatsiyasi tarkibidan qishloq xo‘jaligi, oziq-ovqat sanoati va qayta ishlash, ekologik toza mahsulotlar ishlab chiqarish, qurilish, logistika hamda energiya tejovchi texnologiyalar sohalarida faoliyat yurituvchi kompaniyalar vakillari o‘rin oldi.
Uchrashuv davomida Polsha tomoniga O‘zbekistonning investitsiyaviy muhiti, erkin iqtisodiy zonalar ishtirokchilari uchun imtiyozlar, shuningdek, GSP+ tizimi doirasida Yevropa bozoriga chiqish imkoniyatlari haqida maʼlumot berildi.
Tomonlar hamkorlikning ustuvor yo‘nalishlaridan biri sifatida agrosanoat majmuasini belgiladi. Xususan, O‘zbekistonda ishlab chiqarilgan tabiiy quritilgan meva va sabzavotlarni Polshaga eksport qilish istiqbollari muhokama qilindi.
Shuningdek, tomonlar energiya samaradorligi sohasidagi hamkorlikni, jumladan, energiya tejovchi yechimlar va yashil texnologiyalarni joriy etish masalalarini ko‘rib chiqdi.
Yana bir yo‘nalish sanoat kooperatsiyasi bo‘ldi. Qo‘shma ishlab chiqarish quvvatlarini tashkil etish va o‘zaro tovar yetkazib berish hajmini oshirish masalalari muhokama qilindi.
Polsha biznesi vakillari O‘zbekiston bozori imkoniyatlariga qiziqish bildirib, uzoq muddatli hamkorlikni rivojlantirishga tayyor ekanini taʼkidladi.
Uchrashuv yakunida O‘zbekiston Savdo-sanoat palatasi polsha tadbirkorlariga mahalliy hamkorlarni izlash, tijorat takliflarini almashish va manzilli B2B uchrashuvlarini tashkil etishda amaliy ko‘mak ko‘rsatishga kelishib oldi.
