Toshkent, O’zbekiston (UzDaily.uz) — Namangan viloyati va Avstriyaning IMC Krems amaliy fanlar universiteti kasbiy va dual taʼlim sohasidagi hamkorlikni, jumladan, mehmonxona va turizm sohalari uchun mutaxassislar tayyorlash yo‘nalishini kengaytirish niyatida.
Namangan viloyatiga IMC Krems asoschisi va Kuzatuv kengashi raisi Hayns Boyer boshchiligidagi delegatsiya tashrif buyurdi. Bu haqda Namangan viloyati hokimligi axborot xizmati xabar berdi.
Namangan viloyati hokimi Shavkatjon Abdurazzoqov Avstriya delegatsiyasini qabul qildi.
Uchrashuvda tomonlar mehmonxonalarni boshqarish sohasida xalqaro standartlarga muvofiq mutaxassislar va trenerlar tayyorlash, shuningdek, kasbiy taʼlim tizimida Avstriya tajribasini qo‘llash masalalarini muhokama qildi.
Tashrif doirasida Hayns Boyer va universitetning ilmiy tadqiqotlar hamda innovatsiyalar bo‘yicha rahbari Udo Kristian Brendl Chortoq tumanidagi 1-sonli texnikumga tashrif buyurdi.
Mehmonlar taʼlim muassasasining o‘quv dasturlari, moddiy-texnik bazasi, o‘quv ustaxonalari va laboratoriyalari bilan tanishdi.
Texnikum negizida Avstriya tajribasini inobatga olgan holda taʼlim dasturlarini joriy etish va dual taʼlim modelini yana-da rivojlantirish rejalashtirilmoqda.
Tomonlar taʼlim muassasalari va sanoat o‘rtasidagi hamkorlikni takomillashtirishga ham alohida eʼtibor qaratdi.
Kasbiy taʼlim boshqarmasi boshlig‘i Abdulahad G‘afforovning so‘zlariga ko‘ra, Maktabgacha va maktab taʼlimi vazirligi bilan kelishuvlar doirasida Namanganda Avstriya dual taʼlim tizimi asosida xalqaro mehmonxona menejmenti maktablari tashkil etilmoqda.
1-sonli texnikumga tashrif ushbu ishlarning bir qismi bo‘ldi.
Muzokaralar davomida Avstriyaning kasbiy taʼlim tashkilotlari bilan hamkorlikni yana-da rivojlantirish, qo‘shma taʼlim tashabbuslarini amalga oshirish, o‘qituvchi va talabalar almashinuvi, xalqaro stajirovkalar hamda amaliyotga yo‘naltirilgan taʼlimni rivojlantirish masalalari ham muhokama qilindi.
Avstriya delegatsiyasi, shuningdek, Axsikent arxeoparkiga tashrif buyurib, u yerda amalga oshirilayotgan bunyodkorlik ishlari va tashkil etilayotgan ochiq osmon ostidagi muzeylar bilan tanishdi.
Hayns Boyer «Abadiy shahar» loyihasining taʼsirchan ko‘lamini qayd etib, kelajakda ushbu hudud sayyohlik markaziga aylanishi mumkinligini bildirdi.
IMC Krems vakillari bilan yana bir ishchi uchrashuv «Oydin Plaza» mehmonxonasida bo‘lib o‘tdi. Unda Namangan viloyati hokimi o‘rinbosari Xondamir Ahunboboyev, Hayns Boyer va Udo Kristian Brendl ishtirok etdi.
Ishtirokchilar turizm sohasi uchun kadrlar tayyorlash, qo‘shma taʼlim dasturlarini yo‘lga qo‘yish va taʼlimni amaliyot bilan integratsiya qilish masalalarini yana bir bor ko‘rib chiqdi.
Hamkorlikka 27 sentyabrdan 2 oktyabrga qadar davom etgan O‘zbekiston delegatsiyasining Avstriyaga ishchi tashrifi zamin yaratgan.
Delegatsiya tarkibida Chortoq tumanidagi 1-sonli texnikum direktori A. Xoliqov ham bor edi. Tashrif davomida tomonlar kasbiy taʼlim sohasida tajriba almashdi va hamkorlikni kengaytirishga qaratilgan o‘zaro anglashuv memorandumini imzoladi.
Erishilgan kelishuvlar Namangan viloyatining turizm va mehmonxona xo‘jaligi sohasi uchun amaliy va dual taʼlimni yana-da rivojlantirish, tajriba almashish hamda malakali kadrlar tayyorlashni nazarda tutadi.
