Toshkent, O’zbekiston (UzDaily.uz) — O‘zbekiston Raqobat qo‘mitasi «Hududiy elektr tarmoqlari» AJ va uning tizimiga kiruvchi korxonalarga nisbatan tadbirkorlardan elektr tarmoqlariga qayta ulanish uchun haq undirilgani holatlari bo‘yicha ish qo‘zg‘atdi. Bu haqda Raqobat qo‘mitasi xabar berdi.
Avvalroq tadbirkorlik subyektlarini qo‘llab-quvvatlash choralari doirasida elektr energiyasi uchun qarzdorlikni so‘ndirgandan so‘ng korxonalarni elektr tarmoqlariga qayta ulash uchun jarimalar va qo‘shimcha to‘lovlar bekor qilingan edi.
Davlat organlariga mazkur normalarni qo‘shimcha qonunosti hujjatlar qabul qilinishini kutmasdan, bevosita qo‘llash topshirilgan.
Belgilangan talablarga muvofiq, Elektr energiyasidan foydalanish qoidalariga o‘zgartishlar kiritilib, avval elektr tarmoqlaridan uzib qo‘yilgan isteʼmolchilarni qayta ulash uchun to‘lovlar bekor qilingan.
Shu bilan birga, Biznes-ombudsman tomonidan Raqobat qo‘mitasiga taqdim etilgan maʼlumotlar tahlili hududiy elektr tarmoqlari korxonalari tomonidan asossiz daromad olingani alomatlarini aniqladi.
Idora maʼlumotlariga ko‘ra, 2025 yil 23 avgustdan 2026 yil fevral oyiga qadar respublika bo‘yicha 965 ta holatda tadbirkorlik subyektlaridan elektr tarmoqlariga qayta ulanish uchun 5,5 mlrd so‘m undirilgan.
Aniqlangan holatlar munosabati bilan Raqobat qo‘mitasi «Hududiy elektr tarmoqlari» AJ va uning tizimiga kiruvchi korxonalarga nisbatan ish qo‘zg‘atdi.
Ayni paytda ish holatlari manfaatdor davlat organlari ishtirokida o‘rganilmoqda va tegishli huquqiy baho berilmoqda.
Qo‘shimcha maʼlumotlar ish ko‘rib chiqilishi yakunlari bo‘yicha taqdim etiladi.
