Зироат Мирзиёева ШҲТ маданий тадбирларида иштирок этди

Тошкент, Ўзбекистон (UzDaily.uz) — Ўзбекистон Биринчи хоними Зироат Мирзиёева Шанхай ҳамкорлик ташкилоти саммити доирасида Бишкек шаҳрида ташкил этилган маданий тадбирларда иштирок этди. У билан бирга Қирғизистон, Озарбайжон, Туркия ва Хитой биринчи хонимлари ҳам дастурда қатнашди. Бу ҳақда Ўзбекистон Республикаси Президенти матбуот хизмати хабар берди.

Тадбир доирасида биринчи хонимлар қирғиз халқининг амалий-безак санъати усталари ижодий ишлари кўргазмасини томоша қилди.

Шундан сўнг «Салбуурун» миллий федерацияси вакиллари меҳмонларга қирғиз тайганлари ва қўлга ўргатилган бургутларни намойиш этди. Дастур иштирокчилари, шунингдек, қадимий овчилик анъаналари ҳақида маълумот берди.

Маданий дастур «Энесай» қабуллар уйида якунланди. Бу ерда юқори мартабали меҳмонлар учун Қирғизистоннинг болалар мусиқа ва рақс жамоалари чиқиш қилди.