Япония элчихонаси ўзбекистонликнинг депортациясини маълум қилди

Тошкент, Ўзбекистон (UzDaily.uz) — Япониянинг Ўзбекистондаги элчихонаси қисқа муддатли визанинг амал қилиш муддати тугаганидан кейин Япония ҳудудида ноқонуний равишда бўлиб турган Ўзбекистон фуқароси депортация қилингани ҳақида хабар берди.

Дипломатик ваколатхона маълумотларига кўра, мазкур фуқаро Японияга қисқа муддатли виза билан кирган, аммо рухсат этилган муддати тугагач мамлакатни тарк этмаган. Кейинчалик у Япония ҳуқуқни муҳофаза қилувчи органлари томонидан ушланган.

Элчихона таъкидлашича, ноқонуний яшаш ёки ноқонуний меҳнат фаолияти аниқланган ҳолларда қатъий чоралар қўлланилади. Улар қаторига полиция томонидан ушлаш ва ҳибсга олиш, иммиграция марказига жойлаштириш ҳамда кейинчалик депортация қилиш киради.

Қайд этилишича, Япония ҳукумати қонунбузарлар ҳақидаги маълумотларни Ўзбекистон ҳукуматига тақдим этади. Шундан сўнг фуқаро ватанга қайтганидан кейин тегишли чоралар кўрилиши мумкин.

Шунингдек, хабарда қочқин мақомини олиш учун ариза топшириш орқали Японияда узоқ муддат қолиш ёки ишлаш мумкинлиги ҳақидаги кенг тарқалган нотўғри тасаввурларга ҳам эътибор қаратилган.

Таъкидланишича, ноқонуний равишда мамлакатда қолиш мақсадида қочқин мақомини сўраб ариза беришга йўл қўйилмайди.

Қочқин мақомини бериш рад этилган тақдирда, шахс иммиграция марказига жойлаштирилиши ёки депортация қилиниши мумкин. Бундан ташқари, ариза топшириш жараёнида ёлғон маълумотлар ёки фирибгарлик схемаларидан фойдаланиш жиддий ҳуқуқий оқибатларга олиб келиши мумкин.