Хивада биринчи халқаро Mercure меҳмонхонаси иш бошлади

Тошкент, Ўзбекистон (UzDaily.uz) — Хоразм вилоятининг Хива шаҳрида Mercure меҳмонхонаси иш бошлади. У минтақадаги биринчи халқаро меҳмонхона бренди бўлди. Меҳмонхона қурилишига 26 миллион доллар инвестиция киритилди ва 200 та янги иш ўрни яратилди.

Меҳмонхона 145 та хонага мўлжалланган бўлиб, бир вақтнинг ўзида 300 нафаргача меҳмонни қабул қилиш имкониятига эга. Объектни қуришда тарихий Хива муҳитига мос келиши учун миллий ва замонавий услублар уйғунлигидан фойдаланилган.

Меҳмонхонанинг ишга туширилиши Хоразм вилоятидаги меҳмонхона инфратузилмасини кенгайтиради ва сайёҳларни қабул қилиш учун қўшимча имкониятлар яратади. Халқаро бренднинг пайдо бўлиши Хоразм воҳасининг туристик салоҳиятини янада ривожлантиришга хизмат қилиши кутилмоқда.

Халқаро меҳмонхона брендларининг минтақавий бозорга кириб келиши хорижий сайёҳларни, жумладан, юқори харид қобилиятига эга саёҳатчиларни жалб қилишда аҳамиятга эга. Жойлашиш учун меҳмонхона танлашда хорижлик меҳмонлар кўпинча аввалдан ишонч билдириб келаётган машҳур меҳмонхона тармоқларига эътибор қаратади.

Меҳмонхона инфратузилмасининг ривожланиши бир вақтнинг ўзида туризм соҳасида хизмат кўрсатиш сифати аҳамиятини ҳам оширади.

Хивада Mercure меҳмонхонасининг очилиши меҳмонларни қабул қилиш ва минтақанинг туристик салоҳиятини янада ривожлантириш учун қўшимча шароитлар яратади.