Тошкент, Ўзбекистон (UzDaily.uz) — Хитойнинг Шаньдун провинциясидан келган тадбиркорлар Ўзбекистонда бир қатор соҳалар, жумладан, тўқимачилик саноати, энергетика ва машинасозлик йўналишларида ишлаб чиқаришни ташкил этиш имкониятларини кўриб чиқмоқда.
Бу масалалар Ўзбекистон Савдо-саноат палатаси раисининг ўринбосари Акмалжон Мамажоновнинг Шаньдун провинцияси тадбиркорларининг инвестицияларга кўмаклашиш ассоциацияси делегацияси билан учрашувида муҳокама қилинди.
Ушбу ассоциация провинциянинг 16 та шаҳрида фаолият юритувчи 500 дан ортиқ етакчи компанияни бирлаштиради. Делегация таркибидан кўмир савдоси, тўқимачилик саноати, металл ва металл буюмлар ишлаб чиқариш, янги материаллар ҳамда сунъий интеллект соҳаларида фаолият юритувчи корхоналар вакиллари ўрин олди.
Жумладан, Xiaorun Group компанияси Марказий Осиё бозорини ўрганиш ва Ўзбекистонда чодирлар ишлаб чиқариш заводини қуриш таклифини илгари сурди.
Савдо-саноат палатасида бундай маҳсулотларга талаб мавжудлиги тасдиқланди ҳамда саноат парки ҳудудидан мос ер майдонини танлашда кўмаклашишга тайёрлик билдирилди.
Музокараларда тўқимачилик саноатига ҳам алоҳида эътибор қаратилди. Хитойлик тадбиркорларнинг ип-калава харид қилишга қизиқишини инобатга олиб, уларга ушбу маҳсулотни бевосита Ўзбекистонда ишлаб чиқаришни йўлга қўйиш таклиф этилди.
Шунингдек, компанияни мамлакатдаги энг йирик ип-калава ишлаб чиқарувчилардан бири билан таништириш бўйича келишувга эришилди.
Бундан ташқари, томонлар кўмирни қайта ишлаш бўйича бойитиш фабрикасини қуриш, қуёш панеллари ишлаб чиқаришни маҳаллийлаштириш, полиграфия материалларини етказиб бериш, электромобиллар учун қувватлаш станцияларини ташкил этиш ва қишлоқ хўжалиги техникасини йиғиш соҳаларидаги эҳтимолий ҳамкорликни муҳокама қилди.
Учрашув якунида Хитой делегацияси 29 ноябрдан 5 декабрга қадар Тошкентда бўлиб ўтадиган «Янги Ўзбекистон — глобал имкониятлар чорраҳаси» халқаро форумида иштирок этишга таклиф қилинди.
Томонлар муҳокама қилинган лойиҳаларни амалий жиҳатдан ишлаб чиқишни давом эттириш ва ўзаро манфаатли ҳамкорликни ривожлантиришга келишиб олди.
