Турткўл туманида 12 ёшли ўсмир ҳужжатсиз машина ҳайдагани учун тўхтатилди
Тошкент, Ўзбекистон (UzDaily.uz) — Ижтимоий тармоқларда йўл-патруль хизмати ходимлари томонидан 12 ёшли бола Lacetti автомобилини ҳайдаб кетаётганда тўхтатилгани акс этган видео тарқалди.
Кадрларда мактаб ўқувчиси ўзини дағдағалик билан тутиб, инспекторнинг отаси қаерда ишлаши ҳақидаги саволига: «Ҳозир ўзи келади, ўша пайтда тушунасан», деб жавоб бергани кўринади.
Ҳодиса 1 октябрь куни Турткўл туманида содир бўлган.
Ҳолат жойига ўсмирнинг отаси чақирилган ва унга маъмурий баённома имзолаш таклиф қилинган. Бироқ у айбини тан олишдан бош тортган ва ҳуқуқни муҳофаза қилувчи орган ходимлари билан келишишга уринган.
Натижада унга Маъмурий жавобгарлик тўғрисидаги кодекснинг 135-моддаси 2-қисми (ҳужжатсиз шахслар томонидан транспорт воситасини бошқариш) бўйича баённома тузилган. Автомобиль жарима майдонига жойлаштирилган.
