Тошкент, Ўзбекистон (UzDaily.uz) — «Ўзбекистон Республикаси Миллий инвестиция жамғармаси» АЖ (UzNIF) ишончли бошқарувчиси Franklin Templeton билан ҳамкорликда 13–15 октябрь кунлари Тошкентда иккинчи UzNIF Investor Day 2026 тадбирини ўтказди.
Тадбирда 60 та глобал ва минтақавий активларни бошқарувчи компания вакилларини ўз ичига олган 200 дан ортиқ киши иштирок этди. Бу ҳақда Franklin Templeton маълум қилди.
Инвесторлардан ташқари, тадбирда давлатнинг юқори мартабали вакиллари, инвестиция таҳлилчилари, жамғарма портфелига кирувчи компаниялар вакиллари ҳамда бизнес раҳбарлари қатнашди.
Шимолий Америка, Европа, Яқин Шарқ ва Осиёдан келган инвесторлар Ўзбекистоннинг инвестиция имкониятлари ва жамғарма портфелидаги компанияларда амалга оширилаётган ўзгаришлар билан танишдилар.
Уч кунлик дастур 2026 йил май ойида жамғарма акциялари Лондон фонд биржаси ва «Тошкент» республика фонд биржасида жойлаштирилганидан кейин ўтказилди.
Дастур объектларга ташрифлар, ҳукумат ва Марказий банк вакилларининг чиқишлари, асосий тармоқларга бағишланган экспертлар муҳокамалари, шунингдек, жамғарма ва портфель компаниялари раҳбарияти билан якка тартибдаги ҳамда гуруҳли учрашувларни қамраб олди.
Дастур 13 октябрь куни жамғарманинг асосий активларига ташриф буюриш билан бошланди. Иштирокчилар Чорвоқ гидроэлектр станцияси, Қодирия сув тозалаш станцияси ҳамда «Ўзбекистон ҳаво йўллари» авиакомпаниясининг ҳаво кемаларига техник хизмат кўрсатиш ва таъмирлаш корхонасига бордилар.
Эртаси куни давлат идоралари ва соҳа вакиллари инвестиция муҳити, энергетика, телекоммуникация ва транспорт тармоқларидаги имкониятларни муҳокама қилдилар.
Тадбир 15 октябрь куни инвесторларнинг портфель компаниялари билан учрашувлари орқали якунланди. Учрашувларда бизнес стратегиялари, инвестиция режалари ва келгуси истиқболлар муҳокама қилинди.
Templeton Asset Management компанияси бош ижрочи директори ва Templeton Global Investments инвестициялар бўйича директори Манраж Сехоннинг таъкидлашича, Ўзбекистондаги ислоҳотлар, мамлакатнинг стратегик жойлашуви ва иқтисодиётнинг диверсификация қилингани хорижий инвесторлар учун узоқ муддатли имкониятлар яратмоқда.
Унинг сўзларига кўра, 2026 йил май ойида жамғарма акцияларининг муваффақиятли бирламчи оммавий таклиф (IPO) орқали жойлаштирилиши буни тасдиқлайди. Сехон тадбир иштирокчиларга компаниялар ва давлат вакиллари билан бевосита мулоқот қилиш имконини берганини қайд этди.
Унинг қўшимча қилишича, Franklin Templeton UzNIF орқали давлат активларини глобал капитал билан боғлашга кўмаклашмоқда. Компания инвесторлар билан ишлаш, капитал жалб қилиш ва капитал бозорларини ривожлантиришга ҳисса қўшмоқда.
Templeton Global Investments компаниясининг Марказий Осиё бўйича ижрочи директори Мариус Даннинг айтишича, жамғарма акцияларининг биржа листинги халқаро ва маҳаллий инвесторларга мамлакат иқтисодий ўзгаришларида иштирок этиш имконини берди.
Унинг таъкидлашича, энди асосий вазифа узоқ муддатли қиймат ўсишини таъминлайдиган ташаббусларни амалга оширишдан иборат. Бундай ташаббуслар қаторида мустақил назорат, капитални интизомли тақсимлаш ва жамғарма портфелидаги фаолиятнинг янада шаффофлигини таъминлаш бор.
Жамғарма Ўзбекистондаги иқтисодий ислоҳотлар дастури доирасида Президентнинг 2024 йил 27 августдаги ПҚ-303-сон қарорига мувофиқ ташкил этилган. Унинг асосий вазифалари капитал бозорларини ривожлантиришни қўллаб-қувватлаш, халқаро инвестицияларни жалб қилиш ва давлат корхоналарининг қийматини оширишдан иборат.
UzNIF портфели транспорт, молиявий хизматлар, энергетика, коммунал хўжалик ва телекоммуникация соҳаларида фаолият юритувчи 13 та давлат корхонасининг 25 фоиздан 40 фоизгача бўлган улушларини қамраб олади.
Жамғарманинг ишончли бошқарувчиси вазифасини «Franklin Templeton Asset Management» ХКЧЖ бажаради.
