Тошкент, Ўзбекистон (UzDaily.uz) — Тошкентда қарама-қарши ҳаракатланиш бўлагига чиқиб, авариявий вазиятни юзага келтирган ҳайдовчи маъмурий жавобгарликка тортилди. Қоидабузарлик акс этган видео ижтимоий тармоқларда тарқалди.
Видео тарқалганидан сўнг пойтахт Йўл ҳаракати хавфсизлиги бошқармаси ходимлари автомобил ҳайдовчисининг шахсини аниқлаб, ҳолат юзасидан тушунтириш бериш учун уни бошқармага чақирди.
Профилактик суҳбат давомида ҳайдовчи ишга шошилгани ва атрофдагилар хавфсизлигини ўйламасдан, хавфли манёврни амалга оширганини тушунтирди. У ўз айбини тан олиб, узр сўради ва бундан буён йўл ҳаракати қоидаларини бузмасликка ваъда берди.
Бошқарма вакили қарама-қарши ҳаракатланиш бўлагига чиқиш ҳайдовчининг ўзи ва йўл ҳаракатининг бошқа иштирокчилари ҳаётини хавф остига қўйганини таъкидлади.
Унинг сўзларига кўра, ҳайдовчи ўз бўлагида ҳаракатланганида манзилига атиги беш дақиқа кечроқ етиб борган бўларди, бироқ бу билан атрофдагиларга хавф туғдирмаган бўларди.
Ўрганиш натижаларига кўра, ҳайдовчига нисбатан маъмурий чоралар қўлланилиши маълум қилинди.
Бошқарма ҳайдовчиларни йўл ҳаракати қоидаларига риоя қилишга ва рулда масъулият билан ҳаракатланишга чақирди.
