Тошкентда кўчаларни ободонлаштиришни ҳисобга олган ҳолда янги пиёдалар йўналиши пайдо бўлди
Тошкент, Ўзбекистон (UzDaily.uz) — Тошкентда Yandex Maps фойдаланувчилари учун янги пиёда йўналиш тури — «Яшил» маршрут ишга туширилди. Энди хизмат манзилгача йўл тузишда дарахтлар кўпроқ бўлган, ёзги иссиқда юриш учун қулайроқ йўналишни ҳам таклиф қилади. Бу функция илк бор Тошкент шаҳрида жорий этилди.
«Яшил» маршрутни аниқлаш учун алгоритм ҳар бир йўналишни бир нечта мезон асосида баҳолайди. У очиқ ҳудудлар улуши, дарахт шох-шаббалари билан қопланган майдонлар зичлиги, ҳаво ҳарорати ҳамда маршрут узунлигини ҳисобга олади. Шунингдек, алгоритм йўл давомида очиқ ва сояли ҳудудлар қандай навбатлашишини ҳам таҳлил қилади. Чунки инсон қуёш остида қанча узоқ юрса, йўл шунча иссиқ ва ноқулай сезилиши мумкин. Шу боис дарахтлар сояси тушадиган ҳудудларнинг маршрут бўйлаб бир маромда жойлашгани муҳим аҳамиятга эга.
Бундай йўналишларни аниқлаш учун Yandex Maps жамоаси Тошкентдаги дарахтларнинг рақамли харитасини яратди. Нейротармоқ ёрдамида картографлар шаҳарнинг сунъий йўлдош тасвирларини таҳлил қилиб, дарахтлар тожлари қаерда жойлашгани ва улар қандай майдонни эгаллашини аниқлади. Модель 100 квадрат километр майдонни қамраб олган рангли сунъий йўлдош тасвирини бир-икки дақиқа ичида қайта ишлаб, унда дарахтлар жойлашган ҳудудларни ажратиб кўрсата олади. Модельни ўқитиш жараёнида фойдаланилмаган назорат тасвирлари танловида эса дарахтларни аниқлаш аниқлиги қарийб 90 фоизни ташкил этди. Шундан сўнг олинган натижалар пиёдалар кўчалари, йўлаклар ва пиёдалар ўтиш жойлари билан таққосланди.
«Яшил» маршрут кундалик ҳаётда турли вазиятларда асқотиши мумкин. Масалан, метро ёки автобус бекатига бораётганда, шаҳар бўйлаб сайр қилганда ёки яқиндаги дўкон ёки қаҳвахонага йўл олганда. Янги имкониятдан фойдаланиш учун Yandex Maps'да бошланғич ва якуний нуқтани белгилаб, пиёда маршрутини қуриш кифоя. Агар таклиф этилган йўналишлар орасида «Яшил» маршрут мавжуд бўлса, хизмат уни харитада алоҳида кўрсатади. Фойдаланувчи маршрутларни вақт ва масофа бўйича таққослаб, ўзи учун энг мақбулини танлаши мумкин.
