Тошкентда Кичик ҳалқа йўлида ҳаракат 40 кун чекланади

Тошкент, Ўзбекистон (UzDaily.uz) — 25 июль куни соат 00:00 дан бошлаб Тошкент шаҳри Яккасарой туманидаги Кичик ҳалқа йўлининг бир қисмида автотранспорт ҳаракати вақтинча чекланади. Чекловлар магистрал иссиқлик қувурини алмаштириш ишлари муносабати билан жорий этилмоқда, деб хабар қилди туман ҳокимлиги.

Ишлар «Veolia Energy Tashkent» ХК МЧЖ томонидан амалга оширилади. Компания 40 кун давомида диаметри 530 мм бўлган, умумий узунлиги 1540 метрни ташкил этувчи магистрал иссиқлик қувурини алмаштиради.

Қурилиш-таъмирлаш ишлари давомида Кичик ҳалқа йўлининг мазкур қисмида автотранспорт ҳаракати икки тасма бўйича қисман чекланади.

Туман ҳокимлиги ҳайдовчиларни йўналишларини олдиндан режалаштиришга ва имкони бўлса, муқобил айланма йўллардан фойдаланишга чақирди.