Тошкент, Ўзбекистон (UzDaily.uz) — Тошкент шаҳрининг Шайхонтоҳур туманидаги уйлардан бирининг тўртинчи қаватида ташкил этилган фирибгарлик колл-маркази фаолиятига чек қўйилди. Бу ҳақда Тошкент шаҳар ИИББ матбуот хизмати хабар берди.
Идора маълумотларига кўра, Фарғона вилоятида туғилган Д. Х. шериклари билан биргаликда фуқароларга қўнғироқ қилиб, уларга турли акцияларда гўёки соврин ютганликлари ҳақида хабар берган.
Шундан сўнг гумондорлар «совға учун тўлов»ни якка тартибдаги тадбиркорлик субъектларининг ҳисоб рақамларига ўтказишни таклиф қилган. Бунда маблағлар жабрланувчи номига расмийлаштирилган кредит ёки микрозайм лимитидан фойдаланган ҳолда ажратилиши керак бўлган. Фирибгарлар ваъда қилинган маиший техника кейинроқ етказиб берилишини айтган.
Гуруҳ аъзолари, шунингдек, савдо платформасида товар етказиб берувчилар сифатида рўйхатдан ўтган. Ваъда қилинган маҳсулотни етказиб беришни талаб қилган ёки эътироз билдирган фуқароларга айрим ҳолларда арзон, сифатсиз ёки буюртмага мос келмайдиган товарлар юборилган.
Бундай ёндашув жабрланувчиларнинг эътиборини чалғитиш имконини берган, шундан сўнг гумондорлар уларга ажратилган кредит ёки микрозайм маблағларини ўзлаштирган. Кўп ҳолларда пул ўтказилганидан кейин фуқаролар билан алоқа бутунлай узилган.
Фирибгарлик колл-марказида беш нафар оператор ишлаган. Улар ижтимоий тармоқлар орқали хизматларини тарғиб қилган мавжуд бўлмаган интернет-дўконлар ходимлари сифатида ўзини таништириб, юзлаб фуқароларга қўнғироқ қилган.
Дастлабки маълумотларга кўра, гуруҳ 110 нафардан ортиқ фуқаронинг 300 миллион сўмдан зиёд маблағини ноқонуний равишда қўлга киритган.
Тезкор тадбир давомида ҳуқуқни муҳофаза қилувчи органлар ходимлари ашёвий далил сифатида 10 та компьютер техникаси тўплами, саккизта мобил телефон, фуқароларнинг шахсий маълумотлари ва бошқа ҳужжатларни мусодара қилди.
Айни пайтда гуруҳ аъзоларининг бошқа ҳудудлардаги шу каби ҳолатларга алоқадорлиги эҳтимоли текширилмоқда. Ишнинг барча ҳолатларини аниқлаш ва етказилган зарарни қоплашга қаратилган дастлабки тергов ҳамда тезкор-қидирув тадбирлари давом этмоқда.
