Тошкентда 22 май куни айрим йўллар ёпилади

Тошкент, Ўзбекистон (UzDaily.uz) — Тошкент шаҳар Йўл ҳаракатини ташкил этиш маркази 22 май куни Ўзбекистон миллий терма жамоасини жаҳон чемпионатига кузатиш тадбири муносабати билан транспорт ҳаракати вақтинча чекланишини маълум қилди.

Маълумотга кўра, чекловлар соат 16:00 дан 21:00 гача пойтахтнинг қатор кўчаларида амал қилади. Улар хавфсизликни таъминлаш ва тадбирни юқори савияда ташкил этиш мақсадида жорий этилмоқда.

Кўрсатилган вақт оралиғида шаҳарнинг бир нечта ҳудудида транспорт ҳаракати вақти-вақти билан чекланиши мумкин. Жумладан, Чилонзор–Чўпонота чорраҳасидан Чўпонота кўчаси бўйлаб Чўпонота–Қатортол чорраҳасигача бўлган йўналишда, шунингдек КҲАЙ–Чилонзор чорраҳасидан Чилонзор кўчаси бўйлаб Чилонзор–Чўпонота чорраҳасигача бўлган ҳудудларда чекловлар амал қилади.

Шунингдек, КҲАЙ–Бунёдкор чорраҳасидан Бунёдкор кўчасининг иккинчи даражали йўли орқали Бунёдкор–Чўпонота чорраҳасигача, Нурафшон–Себзор чорраҳасидан Себзор кўчаси бўйлаб Ислом Каримов–Бунёдкор чорраҳасигача, ҳамда Ислом Каримов–Бунёдкор чорраҳасидан Бунёдкор кўчаси бўйлаб Бунёдкор–Иккинчи Қатортол чорраҳасигача бўлган участкаларда ҳам ҳаракат чекланади.

Ҳайдовчиларга олдиндан муқобил йўналишларни режалаштириш ва шаҳар бўйлаб ҳаракатланишда вақтинчалик чекловларни инобатга олиш тавсия этилди.