Тошкент, Ўзбекистон (UzDaily.uz) — «Олимпия шаҳарчаси»да пляж волейболи бўйича CAVA Beach Volleyball Championship халқаро турнири якунланди. Мусобақа натижаларига кўра, Ўзбекистон аёллар терма жамоаси олтин медалларни қўлга киритди, мамлакатнинг иккинчи жамоаси эса бронза медалига сазовор бўлди.
Финал учрашувида Ўзбекистоннинг биринчи терма жамоаси Қирғизистон жамоасини 2:0 ҳисобида ишончли тарзда мағлуб этиб, турнир ғолибига айланди. Учинчи ўрин учун баҳс Ўзбекистоннинг иккинчи ва учинчи терма жамоалари ўртасида бўлиб ўтди. Унда иккинчи жамоа ғалаба қозонди.
Шу тариқа, аёллар ўртасидаги мусобақада биринчи ўринни Ўзбекистоннинг биринчи терма жамоаси эгаллади, кумуш медаллар Қирғизистон жамоасига насиб этди, бронза медални эса Ўзбекистоннинг иккинчи терма жамоаси қўлга киритди.
Мусобақанинг эркаклар қисмида биринчи ўринни Эроннинг биринчи терма жамоаси эгаллади. Қозоғистон жамоаси кумуш медалларга сазовор бўлган бўлса, учинчи ўринни Эроннинг иккинчи терма жамоаси қайд этди.
