Тошкент ва Ереван ўртасида тўғридан-тўғри авиақатновлар режалаштирилмоқда

Тошкент, Ўзбекистон (UzDaily.uz) — Тошкент ва Ереван ўртасидаги мунтазам йўловчи рейслари сўнгги ўн йилликларда илк бор 2026 йилнинг май ойида йўлга қўйилиши мумкин. Парвозлар ҳафтада бир марта Boeing 737 самолётларида амалга оширилиши кутилмоқда.

Янги йўналишнинг очилиши Арманистон ва Ўзбекистон ўртасидаги туристик ҳамда бизнес алоқаларни мустаҳкамлашга, шунингдек, икки мамлакат йўловчилари учун имкониятларни кенгайтиришга хизмат қилиши кутилмоқда. Аввалроқ йўловчилар ушбу йўналиш бўйича Москва, Истанбул ва Тбилиси орқали трансферлар билан етиб олишга мажбур эдилар.

Мазкур йўналишда Еревандаги «Звартнотс» халқаро аэропортида жойлашган Арманистоннинг “Shirak Avia” авиакомпанияси ташувчи сифатида фаолият юритади. Авиакомпания 2019 йилдан буён фаолият юритиб келмоқда ва бир қатор йўналишлар бўйича халқаро рейсларни амалга оширади. Унинг ҳаво кемалари парки Boeing 737 оиласига мансуб самолётлардан иборат.